Կառավարությունը չի փոխանցել «Նաիրիտ» գործարանի 600 աշխատակիցների աշխատավարձերը: Այս մասին այսօր՝ օգոստոսի 4-ին, NEWS.am-ի հետ զրույցում ասաց գործարանի մամուլի նախկին քարտուղար Անուշ Հարությունյանը՝ նշելով, որ օգոստոսի 3-ին խոստացել էին փոխանցել մնացած 600 հոգու աշխատավարձերը:
«2400 աշխատակիցներից 600-ի աշխատավարձերն էլ չէին փոխանցել: Խոստացել էին երեկ փոխանցել, սակայն ոչ մի փոխանցում չի եղել: Մենք այսօր կսպասենք, եթե փոխանցում չեղավ, վաղը նորից կհավաքվենք Կառավարության շենքի մոտ՝ պահանջելու մեր աշխատավարձերը»,-ասաց նա:
Հիշեցնենք, որ գործարանի աշխատակիցների աշխատավարձը հատկացնում է պետությունը՝ էներգետիկայի ոլորտի պետական ընկերությունների շահույթի հաշվին: 2400 նաիրիտցիներից 1800-ն արդեն ստացել է աշխատավարձերը, մնացած 600 աշխատակցի աշխատավարձերը դեռ չեն փոխանցել:
Նաիրիտցիները բազմիցս բողոքի ակցիաներ են կազմակերպել կառավարության ու նախագահի նստավայրի մոտ՝ պահանջելով լուծում տալ իրենց խնդրին: Ձեռնարկությունը չի աշխատում 2010 թվականի ապրիլից: