«Իսլամական պետություն» ահաբեկչական խմբավորման գրոհայինները 2 հազար հոգու նկատմամբ հաշվեհարդար են իրականացրել Մոսուլ քաղաքում (Նինվեի նահանգ)։ Այս մասին հայտնում է «Ալ-Արաբիա» հեռուստաալիքը։

Սպանվածների մեծամասնությունը նախկին զինծառայողներ են եւ ոստիկանության աշխատակիցներ, ինչպես նաեւ տեղացի պետական պաշտոնյաներ։ Նախկինում հեռուստաալիքը հայտնել էր, որ Մոսուլում ծայրահեղականների ձեռքով զոհվել է 120 մարդ եւ ձերբակալվել՝ 350-ը, որոնք «առավելապես նախկին զինծառայողներ են եւ պետական պաշտոնյաներ, որոնք աշխատում էին նահանգում ընտրություններ կազմակերպող տարբեր կառույցներում», փոխանցում է ՏԱՍՍ-ը։

Իրաքի մեծությամբ երկրորդ քաղաքը՝ Մոսուլը, իրաքյան զորքը գործնականում առանց պայքարի հանձնել էր անցյալ տարվա հունիսի 10-ին, երբ ԻՊ-ի զինված խմբավորումները հարձակման էին անցել։ Այժմ Մոսուլի ազատագրումը ԻՊ-ի դեմ իրաքյան բանակի եւ ժողովրդական աշխարհազորի սկսած ռազմական գործողության հիմնական  նպատակն է։ Ներկայումս առավել դաժան մարտեր են ընթանում հարեւան՝ Անբար նահանգում․ որտեղ կառավարական ուժերը հարձակվում են շրջանի երկու առանցքային քաղաքի՝ Ռամադի եւ Էլ-Ֆալուջայի վրա։