Զեյթունում ամուսիններին սպանած եւ իրեն կրակած տղամարդը վարձակալել էր նրանց ավտոտնակը: NEWS.am-ի տեղեկություններով՝ 44-ամյա Տիգրան Մանուկյանը, ով Վրաստանի քաղաքացի է եւ ազգությամբ հայ, ճանաչել է ամուսիններին, վարձակալել էր նրանց ավտոտնակը, որտեղ էլ մեքենաներ էր վերանորոգում:
Դեպքն էլ եղել է «մասնագիտական հողի» վրա ծագած վիճաբանության արդյունքում: Բանն այն է, որ ինչ-որ մեկը եկել է մեքենան վերանորոգելու, սկսել են վիճաբանել, թե լավ չես սարքել, ինչի ես գոռում եւ այլն: Միջադեպին ականատես է լինում նաեւ սպանված տղամարդը, ով եւս միջամտում է: Ու այդպես Տիգրան Մանուկյանը կրակում է տղամարդու ուղղությամբ, եւ երբ կրակոցների ձայները լսելով՝ դուրս է վազում վերջինիս կինը, Տիգրան Մանուկյանը կրակում է նաեւ նրան: Այնուհետեւ, դեպքից ժամեր անց, տեսնելով ոստիկաններին, վերջինս կրակում է նաեւ ինքն իրեն՝ փորձելով ինքնասպան լինել:
Դեպքի վայրում գտնվող մյուս անձինք դիմում են փախուստի: Պարզվում է նաեւ, որ Տիգրան Մանուկյանի զենքը օրինական է:
Ավելի վաղ NEWS.am-ը հաղորդել էր, որ հուլիսի 29-ին, ժամը 18:48-ին ահազանգ է ստացվել, որ Երեւանի Ուլնեցու փողոցի թիվ 30 շենքի բակում սպանվել են ամուսիններ՝53-ամյա Հովհաննես եւ 44-ամյա Լուսինե Մխիթարյանները, որոնք տեղում մահացել են: Նրանց սպանել էին ավտոտնակի մոտ, որտեղ ապրում են: Սպանված տղամարդն ավտոտնակի հարեւանությամբ ավտոտեխսպասարկման կետ ուներ:
Փաստի առիթով հարուցվել է քրեական գործ՝ ՀՀ Քրեական օրենսգրքի 104 հոդվածի (սպանություն) 2-րդ մասի եւ 235 հոդվածի (Ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը) 1-ին մասի հատկանիշներով:
