Իսրայելցի զինվորներն այսօր՝ օգոստոսի 4-ին, գիշերային շուրջկալների ժամանակ 17 պաղեստինցու են կալանավորել Հորդանան գետի արեւմտյան ափին: Այս մասին հաղորդում է իսրայելական հեռուստատեսությունը:
«Օգոստոսի 4-ի գիշերը Իսրայելի պաշտպանության բանակի ուժերը սահմանապահ ծառայության մարտիկների հետ համատեղ Հուդայի եւ Սամարիայի տարածքներում (Հորդանան գետի արեւմտյան ափի իսրայելական անվանումները) 17 արաբների են ձերբակալել, որոնց կասկածում են ահաբեկչական գործունեության մեջ»,-նշում է հեռուստատեսությունը:
Լրատվամիջոցների տվյալներով, ձերբակալվածներից 11-ը կասկածվում է անկարգությունների մասնակցելու, քարեր ու դյուրավառ հեղուկով շշեր նետելու մեջ: Միաժամանակ Կալկիլիա քաղաքում ձերբակալվել է ՀԱՄԱՍ շարժման ակտիվիստներից մեկը, հաղորդում է ՏԱՍՍ-ը: