Ամերիաբանկի ընթացիկ տարվա կիսամյակային գործունեության արդյունքները վկայում են, որ Բանկը շարունակում է պահպանել առաջատար դիրքը ՀՀ բանկային համակարգում` ֆինանսական մի շարք կարեւոր ցուցանիշներով, մասնավորապես, ակտիվներ, պարտավորություններ, հաճախորդների նկատմամբ ունեցած պարտավորություններ, վարկային ներդրումներ:
Բանկի ակտիվները մեկ տարվա ընթացքում աճել են շուրջ 16%-ով եւ 2015թ. առաջին կիսամյակի արդյունքներով կազմել 398.8 մլրդ ՀՀ դրամ, իսկ պարտավորությունները կազմել են 353.5 մլրդ ՀՀ դրամ` ապահովելով 17%-ի աճ:
Բանկի վարկային ներդրումները մեկ տարվա ընթացքում աճել է 34%-ով եւ ընթացիկ տարվա առաջին կիսամյակի արդյունքներով կազմել 257 մլրդ դրամ, իսկ ֆիզիկական անձանց ժամկետային ավանդներն աճել են 25%-ով եւ կազմել շուրջ 94 մլրդ ՀՀ դրամ:
Զուտ շահույթը կիսամյակային արդյունքներով կազմել է ավելի քան 3 մլրդ ՀՀ դրամ` աճելով նախորդ տարվա նույն ժամանակաշրջանի նկատմամբ 5%-ով, ընդ որում, Բանկի գործառնական զուտ եկամուտները հաշվետու ժամանակաշրջանում կազմել են 10.4 մլրդ ՀՀ դրամ` աճելով նախորդ տարվա նույն ժամանակաշրջանի նկատմամբ 23.8%-ով, այդ թվում կոմիսիոն եւ այլ վճարների տեսքով ստացված զուտ եկամուտների աճը կազմել է շուրջ 12%:
Նշենք, որ հաճախորդների համար սպասարկման առավել հարմարավետ պայմաններ ապահովելու նպատակով Ամերիաբանկը շարունակ ընդլայնում է հեռակառավարման համակարգերից` Ամերիա Օնլայն Բանկինգ, Ամերիա Մոբայլ Բանկինգ, Ամերիա Հեռախոսային Բանկինգ, “Ameria Global Trading” առեւտրային համակարգ, Կանխիկի ստացման եւ մուտքագրման բանկոմատներ, օգտվելու հնարավորությունները: Մասնավորապես, մինչեւ սեպտեմբերի 30-ը բանկի ֆիզիկական անձ հաճախորդները կարող են անվճար միանալ Ամերիա Հեռախոսային Բանկինգ ծառայությանը: Կոմունալ վճարումների իրականացման համար Ամերիաբանկը մշակել է արագ եւ հարմարավետ լուծումներ հեռակառավարման տարբեր համակարգերի միջոցով: Կոմունալ վճարումները հնարավոր է կատարել Ամերիա Օնլայն Բանկինգ, Ամերիա Մոբայլ բանկինգ, Ամերիա Հեռախոսային բանկինգ համակարգերի միջոցով, ինչպես նաեւ Ամերիաբանկի բանկոմատների եւ պարբերական հանձնարարականների միջոցով:
