ՌԴ Ենիսեյի տրանսպորտային դատախազությունը վարչական գործ է հարուցել «Տուրուխան» ավիաընկերության եւ նրա օդաչուի նկատմամբ Կրասնոյարսկի երկրամասում Մի-8 ուղղաթիռի առեւանգման պատճառով։ Տուրուխանսկի օդանավակայանի անվտանգության մի քանի աշխատակից հեռացվել են աշխատանքից։
Դատախազությունը պարզել է, որ 2015թ. հունիսի 6-ին «Տուրուխան» ավիաընկերության 2-րդ օդաչուն անցել էր օդանավակայանի հսկիչ անցումային կետը եւ օդ բարձրացրել սանիտարական չվերթների համար հերթապահող Մի-8 ՌԱ 25537 ուղղաթիռը։ Փորձաքննությունը պարզել է, որ օդաչուն եղել է ալկոհոլի ազդեցության տակ, գրում է ՏԱՍՍ-ը։
Դատախազությունից հայտնել են, որ միջադեպը տեղի է ունեցել թռիչքների անվտանգության նորմերի կոպիտ խախտման պատճառով։ Օդանավակայանի օդային անվտանգության աշխատակիցները չեն ապահովել հսկիչ անցումային ռեժիմի պահանջները։