Քաղաքապետ Տարոն Մարգարյանի նախաձեռնությամբ Երեւանի քաղաքապետարանի եւ ՌԴ-ի քաղաքների եւ մարզերի միջեւ համագործակցության ծրագրով Շենգավիթ վարչական շրջանի պատվիրակությունն ացելել է ՌԴ Սոչի քաղաք, որտեղ հանդիպում է ունեցել Սոչիի Կենտրոնական վարչական շրջանի ղեկավարի եւ աշխատակազմի հետ: Հանդիպման ընթացքում քննարկվել են կրթական եւ մշակութային, մարզական եւ մի շարք այլ ոլորտներում կառավարմանն առնչվող հարցեր:
Կողմերը քննարկել են նաեւ փորձի փոխանակման եւ համատեղ գործունեության ծրագրեր, ստորագրվել է «Մտադրությունների մասին» հուշագիր: Այցի ընթացքում երեւանյան պատվիրակության անդամները մասնակցել են «Էթնիկ համայնքների դերը քաղաքի զարգացման համատեքստում» սեմինարին:
Շենգավիթի ներկայացուցիչները այցելել են նաեւ Սոչիի հայկական եկեղեցի, հանդիպել հայկական համայնքի ներկայացուցիչների հետ: Պատվիրակությունը հայկական համայնքին նվիրել է Հայոց մեծ եղեռնին նվիրված գրականություն, «Հայաստանի ազգային ատլաս» ժողովածուն եւ քարտեզների հավաքածու: