Գրոզնիում բացվել է Չեչնիայում առաջին լողափը կանանց համար, հաղորդում է ՏԱՍՍ-ը։
Այն տեղակայված է «Գրոզնիական ծովի» ափին՝ «Լագունա» հանգստյան տան տարածքում, որն ընգրկում է 5 հազար քմ։ Լողափի սպասարկող անձնակազմն ամբողջությամբ կանանցից է կազմված։ Մինչեւ 12 տարեկան տղաների մուտքը թույլատրված է։ «Ստեղծված են բոլոր պայմանները կանանց լիակատար հանգստի համար։ Երեխաների համար կառուցված է մանկական խաղահրապարակ», - նշել է բազայի կառավարիչ Պետիմատ Աղաեւան։
Երեքմետրանոց ցանկապատով շրջափակված տարածքում նաեւ սրճարան կա, բուժկետ եւ աղոթքի սենյակ։ Տնօրինությունը նախատեսել է ԱԻՆ աշխատակցուհիների համար դիտարկման կետի տեղադրում․ նրանց կսովորեցնեն ջրում փրկարարական հիմունքներ։
Լողափի ավազը բերել են Կասպից ծովի ափամերձ շրջանից։ Տարածքը կարող է ընդունել ավելի քան հինգ հազար կնոջ։ «Նախատեսում ենք այստեղ կառուցել նաեւ փակ լողավազանով շոգեբաղնիք աշուն-ձմեռ ժամանակահատվածի համար, ինչպես նաև հանգստի հարմարավետ տնակներ», — ավելացրել է Աղաեւան։