Հանրապետության հրապարակում էլեկտրաէներգիայի թանկացման որոշման չեղարկման պահանջով արդեն 9-րդ օրը նստացույց անող «Ոտքի Հայաստան» նախաձեռնությունն այսօր՝ օգոստոսի 5-ին, ՀԾԿ հանձնաժողովի հրաժարականի պահանջով նամակ հանձնեց ՀԾԿՀ շենք:
Լրագրողների հետ զրույցում շարժման անդամ Դավիթ Հովհաննիսյանը նշեց, որ Հանրապետության հրապարակում այսօր ՀԾԿ հանձնաժողովի հրաժարականի պահանջով սորագրահավաք են նաեւ անելու:
«Վստահ ենք որ մեզ շատ քաղաքացիներ են միանալու: Չգիտենք՝ ինչքան կշարունակվի ստորագրահավաքը, բայց կշարունակենք այնքան մինչեւ անհրաժեշտ թվով ստորագրություններ հավաքվի»,- ասաց նա:
Հիշեցնենք, որ հուլիսի 27-ից Հանրապետության հրապարակում նստացույց են սկսել «Ոտքի Հայաստան» շարժման մասնակիցները: Նրանք պահանջում են չեղարկել էլեկտրաէներգիան 6,93 դրամով թանկացնելու որոշումը,ՀԾԿՀ անդամների հրաժարականները եւ ՀԷՑ–ի ազգայնացում։
