Հղիության 25-րդ շաբաթում գտնվող 23-ամյա Ջուլիետա Գասպարյանը «Էրեբունի» բժշկական կենտրոն է տեղափոխվել հուլիսի 30-ին երեկոյան ծայրահեղ ծանր վիճակում։ Այս մասին NEWS.am-ի թղթակցին ասաց Հայաստանի գլխավոր սրտաբան Համլետ Հայրապետյանը՝ նշելով, որ հղիին իրենց մոտ են ընդունել «Արմենիա» ԲԿ-ից՝ «Պերինատոլոգիայի, մանկաբարձության եւ գինեկոլոգիայի կենտրոնի» ղեկավար Ռազմիկ Աբրահամյանի խնդրանքով։
«Ջուլիետա Գասպարյանը հուլիսի 28-ին ընդունվել է պրոֆեսոր Աբրահամյանի մոտ։ Երկու օր նա կոնսուլտացիա է արել Նորք Մարաշի սրտաբանական կենտրոնի հետ, որտեղից առաջարկել են ինտենսիվ բուժում անել, քանի որ աղջկա մոտ ախտորոշվել էր ծանր սրտային պաթոլոգիա, սեպտիկ էնդոկարբիտ։ Ծննդատան պայմաններում դա հնարավոր չէր անել, իսկ Նորք Մարաշի հիվանդանոցն էլ հրաժարվել էր պառկացնել իրենց մոտ։ Այդ պատճառով Աբրահամյանը զանգեց ինձ հուլիսի երեսունի երեկոյան եւ Ջուլիետային տեղափոխեցինք մեզ մոտ՝ «Էրեբունի» ԲԿ»,- ասաց Համլետ Հայրապետյանը։
Նա պատմեց, որ ի սկզբանե Ջուլիետայի վիճակը ծայրահեղ ծանր է եղել, դեղորայքային բուժում են նշանակել, սակայն նրան փրկել չի հաջողվել։
«Ամսի մեկին պտուղը հեռացրինք, Ջուլիետայի մոտ գրանցվեց սրտի կանգ, մի կերպ վերակենդանացրել ենք եւ տեղափոխել վերակենդանացման բաժանմունքում, սակայն կյանքն այդպես էլ փրկել չհաջողվեց. Ամսի չորսին նա մահացավ»,- ավելացրեց նա։
Պերինատոլոգիայի, մանկաբարձության եւ գինեկոլոգիայի կենտրոնի ղեկավար Ռազմիկ Աբրահամյանը NEWS.am-ի հետ զրույցում հաստատեց, որ Ջուլիետա Գասպարյանն ի սկզբանե ընդունվել է իրենց մոտ, սրտի հետազոտություններից հետո տեղափոխվել է Նորք Մարաշի սրտաբանական հիվանդանոց, ապա «Էրեբունի» ԲԿ։
Հիշեցնենք, որ Ջուլիետա Գասպարյանը մահացել է օգոստոսի չորսին։
