Սահմանադրության նոր նախագծի ընդունումից հետո Հանրապետության նախագահի կարեւորագույն լիազորությունը Սահմանադրության պահպանումն է լինելու։ Այս մասին NEWS.am-ի թղթակցի հետ զրույցում ասաց Սահմանադրական բարեփոխումների մասնագիտական հանձնաժողովի անդամ Հրայր Թովմասյանը։
Թովմասյանի խոսքով՝ խորհրդարանական երկրներում նախագահի ընտրության հարցը որոշվում է տարբեր ձեւերով։
«Մենք առաջարկում ենք, որ նախագահն ընտրվի ընտրիչների կողմից։ Նման տարբերակ ոչ բոլոր երկրներում կա։ Մեծամասնությունը նախագահ ընտրում է խորհրդարանի միջոցով։ Մեր պարագայում խնդիրն այն է, որ եթե նախագահն այլեւս բուն քաղաքական գործընթացների վրա ազդեցություն չի ունենալու, ապա ուղղակի ընտրություններով խնդիր է առաջանում, թե ինչի համար է ինքը ընտրվում»,- ասաց նա՝ հավելելով, որ նախագահի լիազորությունն է Սահմանադրության պահպանումը։
Նշենք, որ Սահմանադրության նոր նախագծով նախատեսվում է անցում կառավարման խորհրդարանական համակարգի։
