«Հայփոստ» ՓԲԸ-ն պաշտոնապես մարեց եւ շրջանառության մեջ դրեց Համահայկական ամառային 6-րդ խաղերը խորհրդանշող նոր փոստային թողարկում`գեղաթերթիկ մեկ նամականիշով: Գեղաթերթիկի մարմանը մասնակցում էին ՀՀ կապի եւ տրանսպորտի փոխնախարար Գագիկ Թադեւոսյանը, ըմբշամարտի աշխարհի չեմպիոն Վաղինակ Գալուստյանը, Համահայկական խաղերի համաշխարհային կոմիտեի անդամներ Հերմինե Դուզյանը եւ Տիգրան Ալթունը, պատվավոր անդամ Հագոպ Կիրմիզյանը, «Հայփոստ» ՓԲԸ գլխավոր գործադիր տնօրեն Հայկ Ավագյանը, ՀՀ ֆիլատելիստների միության նախագահ Հովիկ Մուսայելյանը:
Կապի եւ տրանսպորտի փոխնախարար Գագիկ Թադեւոսյանի խոսքով` բարի ավանդույթ է դարձել բոլոր հատկանշական միջոցառումներին նվիրված գեղաթերթիկ, նամականիշ կամ ծրար ունենալը: «Համահայկական ամառային 6-րդ խաղերն այնքան նշանակալից են մեր ազգի համար, որ նախարարության նամականիշների խորհուրդն ու «Հայփոստ» ընկերությունը որոշեցին ստեղծել թե’ ծրար, թե’ գեղաթերթիկ, թե’ նամականիշ: Հատկանշական է, որ միջոցառմանը մասնակցեցին Համահայկական խաղերի գործադիր խորհրդի անդամներ, հայ նշանավոր մարզիկներ, Ֆիլատելիստների միության նախագահը, «Հայփոստ» ընկերության տնօրենը»,-ասաց Գագիկ Թադեւոսյանը: Փոխնախարարի տեղեկացմամբ` նամականիշը մեծ տպաքանակով գնում է ամբողջ աշխարհով սպառման: «Սա գնում է համալրելու համաշխարհային ֆիլատերիայի նմուշները: Կարծում եմ` Համահայկական ամառային խաղերին նվիրված նամականիշն իր ուրույն տեղը կզբաղեցնի համաշխարհային նամականիշների շարքում»,-հավելեց փոխնախարարը:
Համահայկական խաղերի համաշխարհային կոմիտեի անդամ Հերմինե Դուզյանը, ով ներկայացնում է Ֆրանսիան, հպարտ է նման միջոցառմանը մասնակցելու համար: Նրա կարծիքով` նամականիշի միջոցով հանրահռչակվում են թե’ Համահայկական խաղերը, թե’ Հայաստանն ինքնին:
Համահայկական ամառային 6-րդ խաղերին նվիրված գեղաթերթիկի վրա պատկերված է խաղերի ոսկե մեդալի դիմերեսը եւ դարձերեսը, ոճավորված պատկերված են խաղերի լոգոտիպը եւ գավաթը, ինչպես նաեւ նշված են այն քաղաքները, որտեղ անցկացվելու են խաղերը` Երեւան, Գյումրի, Վանաձոր, Ստեփանակերտ: Նամականիշի վրա պատկերված է մրզադաշտ` վեց հիմնական սպորտաձեւերով, ինչպես նաեւ Համահայկական խաղերի լոգոտիպը:
Համահայկական ամառային 6-րդ խաղերին նվիրված մեկ նամականիշով գեղաթերթիկի դիզայնն իրականացրել է Դավիթ Դովլաթյանը: Տպաքանակը 20 հազար օրինակ է, նամականիշի չափերն են` 28/45 մմ, գեղաթերթիկի չափերը` 52/77 մմ:
