Գյումրիից Երեւան տեղափոխված՝ հղիության 25-րդ շաբաթում գտնված 23-ամյա Ջուլիետա Գասպարյանի մահվան հանգամանքները պարզելու համար ստեղծվել է մասնագիտական հանձնաժողով: Այս մասին հայտնում են առողջապահության նախարարության մամուլի ծառայությունից:
Նրանց փոխանցմամբ՝ հուլիսի 29-ին, ժամը 18:00-ի սահմաններում Շիրակի մարզից 23-ամյա Ջուլիետա Գասպարյանն ընդունվել է «Վերարտադրողական առողջության, պերինատոլոգիայի, մանկաբարձության եւ գինեկոլոգիայի» հանրապետական ինստիտուտ` թոքային հիպերտենզիա ախտորոշմամբ: Հիվանդն ուղեգրվել է «Նորք-Մարաշ» բժշկական կենտրոն հետազոտման, ուր ախտորոշվել է բակտերիալ էնդոկարդիտ (սրտի բորբոքում), պլեւրիտ, սրտի երկփեղկ փականի 3-րդ աստիճանի անբավարարություն, ինչպես նաեւ սրտային անբավարարություն 4-րդ աստիճանի:
Հաշվի առնելով հղիության հետ անհամատեղեի սրտային արատի առկայությունը` հանրապետության լավագույն սրտաբանների մասնակցությամբ կազմակերպված կոնսիլիումների արդյունքում որոշում է կայացվել ընդհատել հղիությունը եւ մոր կյանքը փրկելու համար կատարել անհրաժեշտ վիրահատությունը:
Արդեն իսկ ծանր վիճակում «Էրեբունի» բժշկական կենտրոն տեղափոխված կնոջը կատարվել է կեսարյան հատում, կազմակերպվել են բազմաբովանդակ քննարկումներ եւ նեղ մասնագիտական կոնսիլիումներ, անհրաժեշտ բոլոր միջոցառումները, սակայն կնոջ կյանքը փրկել չի հաջողվել:
Ըստ գործող ընթացակարգերի՝ մայրական մահացության յուրաքանչյուր դեպք, անկախ այդ կապակցությամբ բողոք լինել-չլինելու հանգամանքից, ենթարկվում է մասնագիտական վերլուծության, որի արդյունքները ներկայացվում են մասնագիտական հանձնաժողովին:
