Թուրքիայի քրդական «Ժողովուրդներ դեմոկրատական» (HDP) կուսակցությունից ընտրված ազգությամբ հայ պատգամավոր Կարո Պայլանը NEWS.am-ի թղթակցի հետ զրույցում անդրադարձել է Թուրքիայում տիրող իրավիճակին:
Պարոն Պայլան, ինչո՞վ են պայմանավորված մեծ թվով պայթյունները Թուրքիայում: Ձեր կարծիքով՝ ո՞վ է այս ամենի հետեւում կանգնած:
Թվում էր, որ պայթյունները սկսվել են հունիսին կայացած խորհրդարանական ընտրություններից հետո: Բայց դա այդպես չէ. պայթյուններ մինչեւ այդ էլ են եղել կոնկրետ մեր կուսակցության նկատմամբ: Սակայն մինչեւ խորհրդարանական ընտրությունները՝ մենք ուշադրություն չէինք դարձնում այդ հարձակումներին: Մենք մասնակցեցինք ընտրություններին, անցանք խորհրդարան: Իշխող կուսակցությունը հասկացավ, որ իրենք միակը չեն, ստիպված են կոալիցիա կազմել՝ երկիրը կառավարելու համար:
Թուրքիայի նախագահը՝ պարոն Էրդողանը, պարզապես չէր ցանկանում ընդունել ընտրությունների արդյունքները: Հենց այդ օրվանից էլ նա սկսեց հայտարարել, թե պետք է նոր ընտրություններ տեղի ունենան: Այս կերպ, պարոն Էրդողանը պարզապես փոխում է պարադիգմը. անցած տարի նա հայտարարում էր, թե պատրաստվում են բանակցությունների միջոցով լուծել քրդական խնդիրը, իսկ այսօր փոխում է լեզուն, այսինքն պատրաստվում են խնդիրը լուծել զենքով, ճնշումներով:
Այսօր բազմաթիվ սադրանքների առջեւ ենք մենք կանգնած: Քաոսային իրավիճակ է ստեղծվել, ամեն օր պայթյուններ են տեղի ունենում, երկրում ավելացել է ուժային կառույցների թիվը, հատկապես քրդական քաղաքներում՝ Դիարբեքիր, Մուշ եւ այլն: Բացի դրանից՝ մեծ թվով ուժայիններ պայթուցիկ սարքերով հարձակվում են քաղաքների վրա: Բնակչությունն ամեն կերպ փորձում է պաշտպանել իրեն եւ իր բնակավայրը:
Դժբախտաբար, Թուրքիայի իշխանություններն իրենց այս գործելաոճով կորցնում են կառավարման խորհրդարանական համակարգը: Էրդողանը փորձում է ստիպողաբար կոալիցիա ստեղծել, ինչպես արվել է այս երկրում հարյուրավոր տարիներ: Մեր կուսակցությունը փորձում է փոխել կառավարման համակարգը, ցանկանում ենք ժողովրդավարական պետություն ստեղծել:
Հնարավո՞ր է՝ Թուրքիայում կոալիցիա ձեւավորվի:
Իհարկե, հնարավոր էր, վարչապետն ինքն էլ է մի քանի անգամ հայտարարել, որ պատրաստ են կոալիցիա ստեղծել խորհրդարան անցած կուսակցությունների հետ: Մինչդեռ Էրդողանը մի քանի օր առաջ հայտարարեց, որ երկրում նոր ընտրություններ են անցկացվելու:
Քրդական որոշ լրատվամիջոցներ գրում են, որ PKK-ն Դերսիմը հռչակել է ինքնավար մարզ: Արդյոք տեղեկատվությունը համապատասխանո՞ւմ է իրականությանը:
Մեր կուսակցության ծրագրում հստակ նշված է, որ մենք կողմնակից ենք ցանկացած քաղաքի ժողովրդավարական ինքնավարությանը: Մենք աջակցում ենք Թուրքիայի ցանկացած քաղաքի ինքնավարությանը, որովհետեւ մենք չենք ուզում երկիր, որտեղ նախագահը հսկայական իշխանություն ունի: Մենք ցանկանում ենք իշխանությունը բաժանել տեղական ինքնավար մարզերի կամ քաղաքների միջեւ: Սա չի նշանակում երկրի պառակտում, սրանով մենք հնարավորություն ենք յուրաքանչյուր քաղաքին՝ կառավարելու իր տարածքը: Մինչդեռ Էրդողանը ցանկանում է կառավարել ամբողջ երկրին, յուրաքանչյուրին, ամեն ինչ, որը սխալ է:
Զրուցեց Աիդա Հովհաննիսյանը