ԱԺ ՀԱԿ խմբակցության պատգամավոր Արամ Մանուկյանին հարվածած` Թալինի բնակիչ Արշակ Սվազյանին մեկ ամսվա ազատազրկման դատապարտելու առաջին ատյանի դատարանի վճիռը Վերաքննիչ քրեական դատարանը թողել է անփոփոխ:
Վերաքննիչ քրեական դատարան բողոք էր ներկայացրել Արշակ Սվազյանի պաշտպան Լիանա Բալյանը: Պաշտպանական ճառով Լիանա Բալայանը պահանջել էր փոխել առաջին ատյանի դատարանի վճիռը եւ որպես պատիժ սահմանել տուգանք ՝ նվազագույն աշխատավարձի հիսունապատիկի չափով:
Նրա հայտարարել էր, որ Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանի դատավոր Լեւոն Ավետիսյանը խիստ պատիժ է սահմանել իր պաշտպանյալի նկատմամբ:
Վճռի հրապարակմանը դատական կողմերից ներկա էր միայն մեղադրյալ Արշակ Սվազյանը, արդեն երրորդ անգամ չէր ներկայացել դատախազ Գագիկ Մարգարյանը:
Վճռի հրապարակումից հետո Արշակ Սվազյանն իր պաշտպան Լիանա Բալյանի հետ հեռացավ դատարանից` չցանկանալով պատասխանել հարցերի:
Նշենք, որ Արշակ Սվազյանը պատիժը դատարանի որոշմամբ կկրի քրեակատարողական հիմնարկում դատարանի որոշումն օրինական ուժի մեջ մտնելուց հետո:
Արշակ Սվազյանին մեղադրանք է առաջադրվել ՔՕ 117-րդ հոդվածի հատկանիշներով, խափանման միջոց է ընտրվել ստորագրություն չհեռանալու մասին: Հիշեցնենք, որ 2014թ. դեկտեմբերի 11-ի երեկոյան Ազգային ժողովի ՀԱԿ խմբակցության քարտուղար Արամ Մանուկյանն իր տան մոտ հարձակման էր ենթարկվել: Գործով մեղադրվող Արշակ Սվազյանն իր նախաքննական ցուցմունքում ասել էր, որ Արամ Մանուկյանին հարվածել է, քանի որ վերջինը հրապարակավ հայհոյանքներ է հնչեցրել Սերժ Սարգսյանի հասցեին: