Ռուսաստանն Արեւմուտքին կոչ է անում ահաբեկչությունը չօգտագործել սեփական նպատակների համար, դա անբարոյականություն է, հայտարարել է Ռուսաստանի Արտգործնախարար Սերգեյ Լավրովը` ելույթ ունենալով «Կլյազմայում իմաստների տարածք» երիտասարդական հավաքին:
Ռուսաստանի Արտգործնախարարը հիշեցրել է Իրաքի եւ Լիբիայի ռմբակոծությունների մասին: «Այժմ փորձում են նույն բանը Սիրիային անել: Արդյունքում Իրաքի եւ Սիրիայի տարածքների մի մասում «Իսլամական պետությունը» խալիֆաթ է հայտարարել,-նշել է նա: Կառուցվածքն ամեն անգամ փոխում է իր դեմքը, բայց ամեն անգամ ավելի սարսափելի է դառնում»:
Լավրովը նշել է, որ Արեւմուտքը թալիբներին աջակցում էր ի հեճուկս ԽՍՀՄ-ի, իսկ «Ալ Կաիդային» «ձեռքերը ծալած էին նայում»` հույս ունենալով, որ այն կօգնի փոխել իրենց անհարմար վարչակարգերը, փոխանցում է ՏԱՍՍ-ը http://tass.ru/:
«Այժմ ԻՊ-ը հայտարարել է, որ իրենք Իրաքով եւ Սիրիայով չեն սահմանափակվելու, նույնիսկ քարտեզներ են տպում, որտեղ խալիֆաթը ներառում է Պորտուգալիայից մինչեւ Պակիստան ընկած տարածքը, սպառնում են գրավել Մեքքան եւ Մեդինան,-շարունակել է նա: Մեզ դա համոզում է միայն մի բանում. ահաբեկչության դեմ պետք է պայքարել առանց երկակի չափանիշների, ահաբեկիչներին չօգտագործել սեփական նպատակներում: Նախ` դա անբարոյականություն է, եւ հետո` անհնար է վերահսկել նրանց»:
Նախարարի խոսքով, դա մասնավորապես արտահայտվել է Նյու Յորքում սեպտեմբերի 11-ի ահաբեկչական գործողություններում:
