Հայի քրտինքով ու արյունով թրծված կիլիկյան հողի ու հատկապես Սիսի պատմական կաթողիկոսարանի մեռոնաբույր հողի վրա կանգնած՝ պահանջում ենք մեր դարավոր կաթողիկոսարանի վերադարձն ու վերահաստատում մեր ժողովրդի պահանջատիրությունը՝ հավատարիմ նահատակների սրբազան կտակին։ Մեծի Տանն Կիլիկիո կաթողիկոս Արամ Ա-ի այս բառերն են հնչել Սիսի պատմական կաթողիկոսարանում՝ հայ ժողովրդին ուղղված Հայրապետական պատգամի միջոցով։
Կիլիկիո կաթողիկոսարանի ֆեյսբուքյան էջի փոխանցմամբ,
Մեծի Տանն Կիլիկիո կաթողիկոս Արամ Ա.-ի հանձնարարությամբ կաթողիկոսության միաբանությունը ներկայացնող պատվիրակությունն օգոստոսի 22-ին այցելել է Սիսի կաթողիկոսարան, որտեղ տեղի է ունեցել հոգեհանգիստ՝ 1293-ին Կիլիկիո կաթողիկոսարանը Սիսում հաստատելուց հետո մինչեւ 1915 թվականը Սիսում գահակալած երջանկահիշատակ հայրապետների հոգիների համար։
Ապա միաբանության ներկայացուցիչներն ընթերցել են Արամ Ա.-ի պատգամը։ 100 տարի անց Սիսի կաթողիկոսարանի փլատակների մեջ առաջին անգամ հնչել է հայրապետական պատգամ՝ ուղղված հայ ժողովրդին։
Իր հայրապետական պատգամի մեջ Նորին սրբությունն անդրադարձել է Հայոց ցեղասպանությանն ու սրտաճմլիկ պայմաններում Սահակ կաթողիկոսի աքսորին, ապա հիշատակել է ծերունազարդ հայրապետի խիզախ կեցվածքն իր ժողովրդի իրավունքները պահանջելու հարցում, ինչպես նաեւ նաեւ մարգարեական կանխատեսումը՝ ամբողջական եւ անկախ Հայաստանի մասին։
Արամ կաթողիկոսը վերահաստատել է Մեծի տանն Կիլիկիո կաթողիկոսության հանձնառությունը՝ հայ ժողովրդի արդար իրավունքներին ու Սիսի կաթողիկոսարանին պահանջատեր լինելու հարցում։
Սիսի Կաթողիկոսարան մեկնած միաբանական պատուիրակության կազմում են եղել Կիպրոսի Հայոց Առաջնորդ Գերշ. Տ. Նարեկ Արք. Ալեեմեզյանը, Միջ-եկեղեցական յարաբերութեանց վարիչ Գերպ. Տ. Հուսիկ Ծ. Վրդ. Մարտիրոսյանը, Դպրեվանքի տեսուչ Հոգշ. Տ. Թորգոմ Վրդ. Տոնոյանը եւ Լսատեսողական բաժանմունքի վարիչ Հոգշ. Տ. Պետրոս Վրդ. Մանուելյանը:
Լուսանկարներում Սիսի Կաթողիկոսարանն է, Սիսի բերդը եւ Սիս քաղաքը։
