Դերասան Վարդան Պետրոսյանի մասնակցությամբ ողբերգական վթարից տուժած կողմը եւս 2 քաղաքացիական հայց է ներկայացնելու դերասանի դեմ: Այս մասին այսօր՝ օգոստոսի 24-ին, NEWS.am-ի հետ զրույցում ասաց տուժող կողմի՝ Հակոբյանների փաստաբան Ռուբեն Բալոյանը:
«Մի քանի օրից եւս երկու դատական հայց կներկայացնենք Վարդան Պետրոսյանի դեմ՝ մեկը կապված տուժող Տաթեւիկ Հակոբյանի բուժման ծախսերը փոխհատուցելու, մյուսը` փաստաբանի ծախսերը փոխհատուցելու հետ: Տաթեւիկ Հակոբյանը հիմա գումարի պատճառով բուժում չի ստանում»,-ասաց նա:
Հիշեցնենք, որ 2013 թ. հոկտեմբերի 20-ին, ժամը 21:20-ին Եղվարդ-Երեւան մայրուղու 32-րդ կմ-ում երկու ավտոմեքենա իրար էին բախվել: Պատահարի հետեւանքով 7 մարդ մարմնական վնասվածքներով տեղափոխվել էր հիվանդանոց, այդ թվում՝ դերասան Վարդան Պետրոսյանը: Ավելի ուշ Էդգար եւ Էդուարդ Հակոբյան եղբայրները մահացել էին:
Փաստի առիթով հարուցվել էր քրեական գործ՝ ՀՀ Քրեական օրենսգրքի 242 հոդվածի 3-րդ մասով: Վարդան Պետրոսյանը ձերբակալվել էր: Դատաքննությունը սկսվեց 2014 թվականի մարտի 12-ին: Հայաստանի Կոտայքի մարզի ընդհանուր իրավասության դատարանը 2015թ. հունվարի 29-ին մեղավոր ճանաչեց Վարդան Պետրոսյանին՝ նրան դատապարտելով 5 տարի ժամկետով ազատազրկման:
Դատախազը եւ տուժող կողմը բողոքարկել էին առաջին ատյանի որոշումը, սակայն Վերաքննիչը անփոփոխ էր թողել վճիռը:
