Ազգային ժողովի ՀԱԿ խմբակցության ղեկավար Լեւոն Զուրաբյանին հետաքրքրում է, թե արդյոք Վենետիկի հանձնաժողովի անդամները գիտե՞ն Հայաստանի իշխանությունների՝ Սահմանադրությունը փոխելու իրական նպատակը:
Այսօր՝ օգոստոսի 25-ին, ԵՊՀ-ում հանձնաժողովի անդամների հետ հանդիպմանը ՀԱԿ խմբակցության ղեկավարը եւս մեկ անգամ շեշտեց, որ իրենք դեմ են Սահմանադրական բարեփոխումներին, քանի որ ՀՀԿ-ն դա անում է՝ իշխանությունը չկորցնելու համար:
«Ինձ հետաքրքրում է՝ արդյոք դուք իսկապես գիտեք իրական նպատակը: Դուք ուշադրություն չեք դարձրել մեկ դրույթի վրա. կառավարման համակարգի փոփոխության դեպքում վարչապետին ընտրում է ԱԺ նախագահը: Նման բան ոչ մի խորհրդարանական համակարգ ունեցող երկրում չկա: Խնդրում եմ՝ պատասխանեք՝ արդյոք համակարգի փոփոխությունն արվո՞ւմ է ռեժիմի համար»,- ասաց Լեւոն Զուրաբյանը:
Լեւոն Զուրաբյանը իր խոսքում նշեց, որ Հայաստանում միապետությունն է իշխում, ընդդիմադիր հայացքներ ունեցող ցանկացած անձին իշխանությունները մեկուսացնում են, այդ թվում նաեւ Գագիկ Ծառուկյանին:
Վենետիկի հանձնաժողովի անդամները, ի պատասխան Զուրաբյանի հայտարարությանը, նշեցին, որ քաղաքական հարցերին պատասխանելու իրավասություն չունեն, կարող են միայն Սահմանադրական բարեփոխումների վերաբերյալ իրենց տեսակետները հայտնել:
Հիշեցնենք, որ ԵՊՀ-ում ընթանում է Վենետիկի հանձնաժողովի անդամների հանդիպումը քաղաքական ուժերի հետ: Ներկա են խորհրդարանական բոլոր ուժերի ներկայացուցիչներ: