Հանրաքվեն կարեւորագույն քայլ է, եթե այն լավ է անցնում, հակառակ դեպքում հանրաքվեն կարող է խոչընդոտ դառնալ երկրի բարեփոխումների համար։ Այս մասին օգոստոսի 25-ին Հայաստանի խորհրդարանական խմբակցությունների ու հասարակական կազմակերպությունների ներկայացուցիչների հետ հանդիպման ժամանակ հայտարարել է Վենետիկի հանձնաժողովի անդամ Տալյա Խաբրիեւան (Ռուսաստան)։
Դատական իշխանության եւ հանրաքվեի նկատմամբ վստահության պակասի, ինչպես նաեւ Հայաստանում սահմանադրական բարեփոխումների անցկացման անհրաժեշտության վերաբերյալ՝ «Բաց հասարակության հիմնադրամ» հասարակական կազմակերպության ղեկավար Լարիսա Մինասյանի հարցին ի պատասխան ՝ Տալյա Խաբրիեւան նշել է. «Մենք ընդամենը կարծիք ենք արտահայտում այն տեքստի վերաբերյալ, որը տրամադրել են մեզ։ Այս հարցը գուցե մեր իրավասության ներքո չէ։ Մենք համաձայն ենք, որ դատական իշխանությունների նկատմամբ վստահությունը սահմանադրական բարեփոխումների իրականացման հիմքում է։ Բայց մեզ խնդրել են գնահատել հենց տեքստը»։