Ռուսաստանի Վլադիմիրի մարզի Սուդոգոդսկիի շրջանի դատարանը որոշել է վաղակետ պայմանական ազատ արձակել Ռուսաստանի ՊՆ նախկին աշխատակից Եվգենյա Վասիլեւային: Որոշումն ուժի մեջ է մտնում հրապարակման պահից, հաղորդում է «Ինտերֆաքսը»:
Դատարանի մամուլի ծառայության փոխանցմամբ, վաղակետ պայմանական ազատ արձակման որոշումը քրեակատարողական հիմնարկ կհասնի այսօր, որից հետո Վասիլեւան ազատ կարձակվի:
Դատարանը հաշվի է առել Վասիլեւայի զղջումը եւ նրա լավ վարքը քրեակատարողական հիմնարկում:
Վասիլեւան պարտավոր է տեղեկացնել պատկան մարմիններին բնակության վայրը փոխելու դեպքում՝, ինչպես նաեւ աշխատանքային գործունեությունը ծավալել ու հասարակական վայրերում չհայտնվել ոչ սթափ վիճակում:
Նշենք, որ Մոսկվայի Պրեսնենյան շրջանի դատարանը մայիսի 8-ին «Օբորոնսերվիսի» գործով հիմնական մեղադրյալ Վասիլեւային դատապարտել էր հինգ տարվա ազատազրկման ընդհանուր ռեժիմի կալանավայրում: Նա մեղավոր է ճանաչվել առանձնապես խոշոր ծավալի խարդախության վեց կետով (ՌԴ ՔՕ 159, մաս 4), անօրինական եղանակով ստացված գումարների օրինականացման (ՌԴ ՔՕ հոդված 174), ինչպես նաեւ պաշտոնեական դիրքը չարաշահելու համար (ՌԴ ՔՕ հոդված. 201):
«Օբորոնսերվիսի» գործով եւս չորս մեղադրյալի դատարանը ազատազրկման է դատապարտել 3,5-ից 4 տարով եւ 3 ամսով:
