Ռուբլու անկումը խորացնում է տարանջատումն ազատ առեւտրի նախագծի մասնակիցների միջեւ, որը գլխավոր է Ռուսաստանի նախագահ Վլադիմիր Պուտինը՝ նպատակ ունենալով միավորել նախկին խորհրդային հանրապետություններին: Այս մասին «Bloomberg»-ում հրապարակված հոդվածում գրել են լրագրող Նարիման Գիզիտդինովն ու խմբագիր Էնթոնի Հալփինը:
«Անցյալ շաբաթ Ղազախստանը նվազեցրեց իր արժույթի փոխարժեքն այն բանից հետո, երբ ձեռներեցները բողոքեցին, որ ռուսական ընկերությունները ներքին շուկաները ողողել են ավելի էժան ապրանքներով: Բելառուսում, որը Եվրասիական տնտեսական միության հիմնադիր-անդամ է, Ռուսաստանի հետ արտաքին առեւտրի բալանսի դեֆիցիտն անցյալ տարի ավելացել է մեկ քառորդով»,- նշել են նրանք:
Հոդվածի հեղինակների կարծիքով, նախկին խորհրդային երկրների առեւտրի բլոկի շուրջ Պուտինի տեսլականը, որի վրա արդեն բացասական ազդեցություն է ունեցել ուկրաինական պատերազմը, տուժում է անդամների միջեւ աճող տարանջատման պատճառով, մինչդեռ նավթի գներն ու պատժամիջոցները թուլացնում են ռուբլին եւ կրճատում ռուսական տնտեսության ծավալները: «Ռուսաստանի գերակշռող դերի առիթով արդեն գոյություն ունեցող մտահոգությունների ֆոնին, այդ երկրի որոշ ընկերությունների գործողություններին արձագանքը սպառնում է հարված հասցնել ավելի սերտ ինտեգրման շուրջ միության նպատակներին»,- ընդգծել են նրանք:
Հոդվածում ներկայացված են նաեւ «Bloomberg»-ի տվյալները, որոնց համաձայն՝ ռուբլին դոլարի նկատմամբ վերջին տարիների վատագույն ցուցանիշներն է արձանագրում. անկումը 49% է: Բելառուսական ռուբլու փոխարժեքը նվազել է ավելի քան մեկ երրորդով՝ միայն երեքշաբթի կորցնելով 4.9%, իսկ ԵՏՄ նոր անդամներ Հայաստանի եւ Ղըրղզստանի ազգային արժույթները՝ 15% եւ 16%-ով:
«Մոտ ապագայում միասնական արժույթի ներդրման կամ ավելի խորը ինտեգրման հեռանկարներ չկան՝ ըստ Բելառուսի նախագահ Ալեքսանդր Լուկաշենկոյի, որն ապրիլին հայտարարեց, որ ո՛չ իր երկիրը, ո՛չ Ղազախստանը պատրաստ չեն «ինչ-որ կայսրության անդամ» դառնալ»,- նշել են հոդվածի հեղինակները:
Հոդվածում ներկայացվում է նաեւ Մոսկվայի տնտեսագիտության բարձրագույն դպրոցի պրոֆեսոր, առեւտրային քաղաքականության ոլորտի մասնագետ Ալեքսեյ Պորտանսկիի կարծիքը, ով նշել է, որ Ռուսաստանն «առաջին ջութակն է ինտեգրման գործընթացում, այնպես որ՝ այն ազդում է այն ամենի վրա, ինչ տեղի է ունենում Ղազախստանում»: «Ռուսաստանի ճգնաժամի պատճառով ներկայում Եվրասիական տնտեսական միությունը լրացուցիչ խնդիրների է բախվում»,- կարծում է փորձագետը: