Վրաստանի Բաթումի քաղաքում օգոստոսի 25-ի երեկոյան տեղացած ուժեղ անձրեւն ավերածություններ չի առաջացրել: Այս մասին NEWS.am-ի թղթակցին ասաց Բաթումիում ՀՀ գլխավոր հյուպատոս Արամ Գրիգորյանը:
Նա հայտնեց, որ այս պահին իրավիճակը քաղաքում հանգիստ է:
«Բաթումիում այնպիսի պայմաններ են, որ ջուրն անմիջապես ներծծվում է, խողովակներով անցնում գետնի տակ: Հիմա համարյա չոր է, թեեւ ջուրը երեկ գիշեր մինչեւ ծնկներ էր հասնում: Ավերածություններ չկան, տուժածներ նույնպես»,- ասաց հյուպատոսը:
Ավելի վաղ հայտնել էինք, որ Վրաստանի Բաթումի քաղաքում օգոստոսի 25-ին հորդառատ անձրեւների, քամու եւ 4-բալանոց փոթորիկի հետեւանքով քաղաքի փողոցները ջրի տակ են անցել: Ջրի տակ են հայտնվել շենքերի առաջին հարկերը եւ երկաթգծի կայարանը, բնակիչների մի մասը մնացել է առանց էլեկտրականության: