«Այբ» հիմնադրամը և «Այբ» դպրոցը երբևէ որևէ մեկին աշխատանքի չեն ընդունել կամ աշխատանքից ազատել` ելնելով նրա քաղաքական դիրքորոշումից, ազգային կամ կրոնական պատկանելությունից: Այս մասին ասվում է այսօր՝ օգոստոսի 26-ին «Այբ»-ի տարածած հայտարարությունում, որով հիմնադրամը հերքում է «Հիմնադիր խորհրդարանի» պնդումները, թե նախաձեռնության քարտուղարության անդամ Գեւորգ Սաֆարյանը դպրոցում իր աշխատանքից ազատվել է քաղաքական հայացքների համար:
«Այբ»-ը հարգում է յուրաքանչյուրի ընտրության իրավունքը և որևէ միջամտություն չի ունենում այդ ընտրության գործում: Ասվածի վառ ապացույցն է այն, որ ս. թ. հունվարի 12-ից Գ. Սաֆարյանն աշխատանքի է անցել «Այբ» դպրոցում, երբ գործազուրկ էր և արդեն իսկ հասցրել էր հանրությանն ի ցույց դնել իր քաղաքական հայացքները: Խորը ափսոսանք ենք հայտնում, որ Գ. Սաֆարյանը, միջոցների մեջ խտրականություն չդնելով, այս անգամ «ինքնահերոսացման ներշնչանք» է դարձրել իր գործատուին»,- ասվում է հայտարարությունում:
Հայտարարության համաձայն՝ ի թիվս այլ աշխատակիցների՝ Գեւորգ Սաֆարյանի հետ տեղի է ունեցել զրույց, որի ընթացքում նրան ներկայացվել է «Այբ» դպրոցում սպասվելիք էական կառուցվածքային փոփոխությունների անհրաժեշտությունը: Այդ փոփոխություններն անմիջականորեն ազդելու են 16 հաստիքի վրա:
«Ակնհայտ է, որ Գ. Սաֆարյանը միտումնավոր կերպով հրահրում է աշխատանքային պայմանագրի աղմկահարույց խզում՝ նպատակ ունենալով հերթական անգամ ուշադրություն գրավել սեփական անձի վրա: Գ. Սաֆարյանի և «Այբ» դպրոցի փոխհարաբերությունները կրում են բացառապես աշխատանքային բնույթ, և մեզ համար անընդունելի է դրանց տեղափոխումն այլ հարթություն»,- նշվում է պաշտոնական հայտարարության մեջ:
«Այբ» հիմնադրամը նաեւ հերքում է «ՀԽ» հայտարարությունը, թե նախագահ Սերժ Սարգսյանը «Այբ» հիմնադրամի, «Այբ» դպրոցի հոգաբարձուների կամ գործադիր կամ ղեկավար մարմնի կազմում է:
Սաֆարյանը աշխատում էր «Այբ» դպրոցում՝ որպես անվտանգության աշխատակից:
