Սերժ Սարգսյանի հետ հանդիպմանը «Բարգավաճ Հայաստան» կուսակցությունն իր մոտեցումները եւ մտահոգություններն է ներկայացրել Սահմանադրության նոր նախագծի մի շարք դրույթների վերաբերյալ: Այս մասին NEWS.am-ի թղթակցի հետ զրույցում ասաց ԱԺ ԲՀԿ խմբակցության պատգամավոր Միքայել Մելքումյանը, որը նույնպես այօր՝ օգոստոսի 26-ին, մասնակցել է նախագահի հետ հանդիպմանը:
«Մենք մեր դիրքորոշումները, մոտեցումներն ենք հայտնել, ինչպես նաեւ մտահոգությունները՝ կապված կայուն մեծամասնության, ընտրիչների ինստիտուտի, քննիչ հանձնաժողովում ընդդիմության դերի մասին: Բավականին հարցերի պատասխաններ են տրվել: Մենք բավարարված ենա այս հանդիպումից»,- ասաց Միքայել Մելքումյանը:
Նա նշեց, որ Սահմանադրական բարեփոխումների վերաբերյալ իրենց մոտեցումը մոտ է դրականին, սակայն վերջնական դիրքորոշումը կհայտնեն առաջիկայում՝ կուսակցության քաղխորհրդի եւ խմբակցության նիստերից հետո:
«Այնուամենայնիվ, մենք վերահաստատում ենք, որ «Ոչ»-ի շարժմանը չենք միանալու»,- ասաց նա:
Նշենք, որ Հանրապետության նախագահ Սերժ Սարգսյանը օգոստոսի 26-ին սկսել է քաղաքական խորհդրակցությունները քաղաքական ուժերի հետ՝ կապված Սահմանադրական բարեփոխումների հետ: Նախագահն առաջինը հանդիպել է «Բարգավաճ Հայաստան» կուսակցության ներկայացուցիչների հետ:
Ավելի վաղ հայտնել էինք, որ Սահմանադրության նոր նախագիծն արդեն ուղարկվել է Ազգային ժողով: Սպասվում է, որ աշնանային նստաշրջանի առաջին քառօրյայում կսկսվեն քննարկումները: ԱԺ նախագահի խոսքով՝ աշնան վերջին արդեն նախատեսվում է հանրաքվեն: