Երեւանում օգոստոսի 26-ից օդի ջերմաստիճանը կբարձրանա 2-3 աստիճանով: Այս մասին NEWS.am-ի թղթակցի հետ զրույցում ասաց ՏԿԱԻՆ «Հիդրոմետ» ծառայության օդերեւութաբանության կենտրոնի պետի տեղակալ Գագիկ Սուրենյանը:
Նրա խոսքով՝ օգոստոսի 22-ից Հանրապետության տարածքում գործում է Սեւծովյան ցիկլոնը, վերջին 5 օրերին երկրի ողջ տարածքում ժամանակ առ ժամանակ դիտվել են անձրեւներ, առանձին վայրերում տեղումների քանակը եղել է զգալի:
«Ցիկլոնն իր հետ հանրապետության տարածք է տեղափոխել արկտիկական սառը օդային հոսանքներ, ինչի արդյունքում օդի ջերմաստիճանը զգալի նվազել է եւ ներկա պահին նորմայից ցածր է 5-7 աստիճանով: Օգոստոսի 26-ից սկսած ցիկլոնը կկորցնի իր ուժը, եւ տեղումները հիմնականում կլինեն կարճատեւ բնույթի եւ հատկապես կդիտվեն օրվա երկրորդ կեսին»,- ասաց նա:
Սուրենյանի խոսքով՝ առաջիկա օրերին օդի ջերմաստիճանը մի փոքր կբարձրանա: Եթե մայրաքաղաքում օգոստոսի 25-ին ջերմաստիճանը +21...+23 էր, ապա օգոստոսի 27-29-ը ջերմաստիճանը կտատանվի +24...+26, իսկ օգոստոսի 30-ից ջերմաստիճանը կբարձրանա եւս 2-3 աստիճանով եւ ցերեկը կտատանվի +26...+28 աստիճանի սահմաններում:
