Սիսիանի ավագանու անդամ Սրբուհի Գրիգորյանը վարչապետին ուղղված նամակում բարձրաձայնել է Սիսիանի եւ Գորիսի հրատապ խնդիրների լուծմանը հատկացվող ֆինանսական միջոցների անհամաչափության մասին:
NEWS.am-ի թղթակցի հետ զրույցում ավագանու անդամը հայտնեց, որ կառավարությունը Սիսիանին 36 մլն դրամ է տրամադրել, իսկ Գորիսին՝ 130 մլն դրամ:
«Վիրավորական է, մոտ 100 մլն դրամի տարբերություն է: Սիսիանին հատկացվել է 36 մլն դրամ, որից 20 մլն-ը՝ հիվանդանոցի վերանորոգման համար, իսկ մնացած 16 մլն-ը՝ բակեի ասֆալտապատման: Մինչդեռ Սիսիանում բակերի ասֆալտապատումը լուրջ խնդիր է եւ իմ մտահոգությունն է, որ քաղաքի բոլոր բակերն ասֆալտապատվեն: Համեմատության համար նշեմ, որ Գորիսի մեկ թաղամասի ասֆալտապատման համար 60 մլն դրամ է հատկացվել»,- ասաց Սրբուհի Գրիգորյանը:
Վարչապետին ուղղված նամակը մակագրվել է Սյունիքի մարզպետարան, որտեղից ավագանու անդամին պատասխանել են՝ առանց որեւէ հստակ պատասխան ներկայացնելու:
«Համապատասխան ժամկետում ստացել եմ նամակիս պատասխանը, բայց ոչ հարցերիս: Որպես հակափաստարկ՝ նշում են, թե Սիսիանի տարածաշրջանում 2012-2015 թվականների ընթացքում կատարվել են 500 մլն դրամով ավելի շինարարական աշխատանքներ: Այս տարածաշրջանն ամենամեծն է Սյունիքում եւ բնականաբար, ավելի մեծ գումարներ պետք է հատկացվեն, բայց դրանց մեծ մասն ուղղվել է դպրոցաշինությանը: Մինչդեռ ես խոսում եմ Սիսիան քաղաքի մասին»,- նշեց Սրբուհի Գրիգորյանը:
Նա ընդգծեց, որ նամակի բովանդակության մասին քաղաքապետը ոչինչ չի իմացել:
Ավելի վաղ «Հայկական ժամանակ»-ը, հղում անելով NewsBook-ին, հայտնել էր, որ իսիանի քաղաքապետարանի ավագանու անդամներից Սրբուհի Գրիգորյանը նամակ է գրել Հովիկ Աբրահամյանին եւ տեղեկացրել, որ քաղաքին տրամադրվող գումարները չեն ծառայում իրենց նպատակին այն պարզ պատճառով, որ դրանք պարզապես տեղ չեն հասնում եւ ճանապարհին կորում են: Իրավիճակը հասկանալու համար Սիսիան է գալիս Սուրիկ Խաչատրյանը եւ քաղաքապետ Աղասի Հակոբջանյանից սկսում է պարզաբանում պահանջել, թե ինչո՞ւ է նման բովանդակությամբ նամակ գրվել վարչապետին:
Բանը հասնում է նրան, որ քաղաքապետը ստիպված է լինում բռունցքով կարգի հրավիրել մարզպետին, ինչի արդյունքում՝ Լիսկային օգնության են հասնում վերջինիս՝ դրսում սպասող թիկնապահները: Սկսվում է ծեծկռտուք, որից հետո մարզպետը լքում է Սիսիան քաղաքը:
Աղասի Հակոբջանյանը մեզ հետ զրույցում հերքել է, որ մարզպետի եւ իր միջեւ ընդհարում է տեղի ունեցել:
