ԲՀԿ-ն ու ՀՅԴ-ն հիմնավորված հույսեր ունեն, որ իշխանական Հանրապետական կուսակցության հետ միասին կայուն մեծամասնություն կձեւավորեն։ Այս մասին օգոստոսի 27-ին մամուլի ասուլիսում հայտարարել է Հայաստանի առաջին օմբուդսմեն, «Իրավական ամենաթողության դեմ» հասարակական կազմակերպության ղեկավար Լարիսա Ալավերդյանը ՝ հավելելով, որ կայուն մեծամասնությունը ոչ միշտ է դրական երեւույթ։
Անդրադառնալով ՀՀ նախագահ Սերժ Սարգսյանի հետ քաղաքական կուսակցությունների ներկայացուցիչների երեկվա հանդիպումներին ՝ Լարիսա Ալավերդյանը նշել է․ «ՀՅԴ-ն ամենասկզբից ասում էր, որ սահմանադրական բարեփոխումների վերաբերյալ համագործակցության ընդհանուր եզրեր է տեսնում, այսինքն ոչ մի զարմանալի բան այստեղ չկա։ Ինչ վերաբերում է «Բարգավաճ Հայաստանին» ՝ Սահմանադրական բարեփոխումների վերաբերյալ նրա նախնական կտրուկ հայտարարությունները ոչնչով հիմնավորված չէին։ Փաստորեն իշխանության վերարտադրման սպառնալիքը քաղաքական խնդիր էր»։
Հիշեցնենք, որ օգոստոսի 26-ին նախագահ Սարգսյանը քաղաքական խորհրդակցություններ էր սկսել Հայաստանի քաղաքական ուժերի ներկայացուցիչների հետ։ Սերժ Սարգսյանի նստավայրում սահմանադրական բարեփոխումները քննարկել են ԲՀԿ, ՀՅԴ եւ «Օրինաց երկիր» կուսակցությունների անդամները։