Վրաստանում ՆԱՏՕ-ի մարզման եւ գնահատման համատեղ կենտրոնի բացումը շատ կարեւոր քայլ է, որը էլ ավելի կխորացնի սերտ համագործակցությունը ու կբարձրացնի Վրաստանի ԶՈՒ մարտունակությունը ՝ էլ ավելի արդիականացնելով դրանք։ Այս մասին հայտարարել է ՆԱՏՕ գլխավոր քարտուղար Յենս Սթոլթենբերգը ՝ Վրաստանի վարչապետ Իրակլի Ղարիբաշվիլիի հետ Վրաստանում համատեղ ճեպազրույցի ժամանակ։
«Մեր համագործակցությունն արդեն երկար տարիների պատմություն ունի։ Մենք Վրաստանին օգնում ենք բարձրացնել իր մասնագետների որակավորումը, որպեսզի նրանք կարողանան ավելի սերտ համագործակցել ՆԱՏՕ անդամ երկրների հետ։ Այսօր մենք կրկնապատկում ենք մեր համագործակցությունը։ Մարզման ու գնահատման կենտրոնի բացումը շատ կարեւոր քայլ է լինելու, որը էլ ավելի կխորացնի մեր՝ առանց այդ էլ սերտ համագործակցությունը։ Այն կբարձրացնի Վրաստանի ԶՈՒ մարտունակությունը ու այն ավելի արդիական կդարձնի։ Բացի դրանից կենտրոնը կնպաստի ՆԱՏՕ-ի հետ համագործակցության ուժեղացմանը ՝ միջազգային անվտանգության ապահովման գործում համատեղ ավանդ ներդնելու համար»,- հայտարարել է Սթոլթենբերգը, հայտնում է «Վրաստան Օնլայնը»։
Վրաստանի վարչապետ Իրակլի Ղարիբաշվիլին էլ իր հերթին հայտարարել է, որ ՆԱՏՕ-ի ուսումնամարզական կենտրոնը, որը օգոստոսի 27-ին կբացվի Վրաստանում, ուղղված չի լինելու որեւէ հարեւան երկրի դեմ։
Ինչպես նշում է «Նովոստի-Վրաստանը» ՝ պաշտոնական Մոսկվան բազմիցս իր մտահոգությունն է հայտնել ՝ Վրաստանում մարզական կենտրոնի բացման եւ Վրաստանի ՝ դաշինքին անդամակցելու ծրագրերի կապակցությամբ։
«Մարզական կենտրոնի գործունեությունը ոչ մի կերպ ուղղված չի լինելու որեւէ հարեւան երկրի դեմ։ Ավելին ՝ այն կծառայի տարածաշրջանային անվտանգությանը, կայունությանն ու խաղաղությանը»,- ասել է Գարիբաշվիլին։