Եվրասիական տնտեսական միությունը դեռեւս չի դարձել «ազգերի բանտ»։ Այս մասին «Դիալոգ» միջազգային մամուլի կենտրոն» նախագծի շրջանակներում «Ռեգիոն» հետազոտական կենտրոնի կազմակերպած ինտերնետ մամուլի ասուլիսի ժամանակ հայտարարեց ռուս քաղաքագետ, եվրասիական ինտեգրացիայի եւ Կենտրոնական Ասիայի երկրների հարցերով փորձագետ Արկադի Դուբնովը՝ անդրադառնալով այն հարցին, թե արդյոք Հայաստանը հնարավորություն ունի նորմալ հարաբերություններ պահպանել Արեւմուտքի հետ ԵՏՄ-ին անդամակցելուց հետո։
«Այլ հարց է, որ ԵՏՄ-ին անդամակցելով, Հայաստանը ավելի քիչ հնարավորություններ ունի աշխարհաքաղաքական պլանում մանեւրելու համար։ Սակայն եթե Հայաստանի գլխավոր արտաքին առաջնայնությունը դիտարկենք նրա անվտանգությունը, ապա ստիպված ենք հիշել մարքսիստական դասական արտահայտությունը՝ «ազատությունը գիտակցված անհրաժեշտություն է»,- ընդգծեց Արկադի Դուբնովը
Հարցին, թե ինչպիսին է նա տեսնում ԵՏՄ ապագան Ռուսաստանի եւ Արեւմուտքի հակազդեցության ենթատեքստում, Արկադի Դուբնովը պատասխանեց. «Ոչ շատ լավատեսական։ Բայց միությունը կապրի։ ԱՊՀ-ն չի մահացել չէ՞։ Իսկ գիտե՞ք ինչու, որովհետեւ նրանից քիչ բան է կախված։ Հիշու՞մ եք անորսալի Ջոյի մասին անեկդոտը»։