Այս տարվա ամառվա երեք ամիսներին երեխաների մասնակցությամբ 123 ճանապարհատրանսպորտային պատահար է գրանցվել, որոնց հետեւանքով զոհվել է 6 երեխա: Այս մասին այսօր՝ օգոստոսի 27-ին, լրագրողներին ասաց Ճանապարհային ոստիկանության Ճանապարհապարեկային ծառայության բաժնի պետ, ոստիկանության գնդապետ Նորիկ Սարգսյանը:
«Ոստիկանությունը դեպի հանգստյան գոտիներ գնացող 300 ավտոբուսների ուղեկցումներ է կազմակերպել, ոչ մի պատահար չի եղել: Այնուամենայնիվ, հունիս-օգոստոս ամիսներին ճանապարհային 123 պատահար է տեղի ունեցել երեխաների մասնակցությամբ, որոնց հետեւանքով զոհվել է 6, վիրավորվել 136 երեխա»,- ասաց Նորիկ Սարգսյանը:
Ոստիկանության գնդապետը նշեց, որ նախորդ տարվա նույն երեք ամիսների համեմատ երեխաների մասնակցությամբ պատահարների թիվը նվազել է 4-ով, զոհերինը` նույնպես, վիրավորների թիվը պակասել է ութով:
Նորիկ Սարգսյանի խոսքով՝ պատահարները հիմնականում տեղի են ունենում երեխաների՝ փողոցը պատահական վայրից անցնելու, փողոցում հեծանիվ վարելու պատճառով: