Առաջիկա ամիսներին տրանսպորտը չի թանկանա: Այս մասին այսօր՝ օգոստոսի 27-ին, լրագրողների հետ զրույցում ասաց Երևանի քաղաքապետարանի աշխատակազմի տրանսպորտի վարչության պետ Հենրիկ Նավասարդյանը։
«Տրանսպորտի թանկացման վերաբերյալ առայժմ խոսակցություններ չկան, մոտ ապագայում էլ չեն կարող լինել: Սպասարկող կազմակերպությունների կողմից, իհարկե, դժգոհություններ կան, թանկացման խնդիրը նրանց կողմից էր ժամանակին դրված, քննարկումներ եղան, կասեցվեց, եւ քննարկումները մինչեւ այժմ շարունակվում են»,- ասաց Հենրիկ Նավասարդյանը:
Հիշեցնենք, որ 2013թ. ամռանը տրանսպորտի սակագինը քաղաքապետի որոշմամբ 100-ից դարձավ 150: Որոշման դեմ հասարակական լայն ընդվզում սկսեց ու մի քանի օր տեւած բողոքի ակցիաներից հետո որոշումը կասեցվեց:
