Սերժ Սարգսյանի հետ կառուցողական քննարկում է տեղի ունեցել: Այս մասին NEWS.am-ի թղթակցին ասաց ՀՀՇ վարչության անդամ, ԱԺ «Ժառանգություն» խմբակցության պատգամավոր, Ալեքսանդր Արզումանյանը, որն այսօր՝ օգոստոսի 27-ին, ՀՀՇ-ականների հետ մասնակցել է նախագահի հետ հանդիպմանը:
«Քաղաքական գործընթաց է, որին չենք կարող անմասն մնալ: Մենք ունեինք խնդիրներ, առաջարկություններ, որոնց մի մասը տեղ են գտել Սահմանադրության նոր նախագծում: Կան խնդրահարույց հարցեր, որոնց վերաբերյալ մեր առաջարկություններն ու մտահոգություններն ենք հայտնել, մասնավորապես երկփուլ ընտրությունների դրույթի, ընտրիչների ինստիտուտի ներդրման եւ այլն»,- ասաց Ալեքսանդր Արզումանյանը:
Նա նշեց, որ ՀՀՇ-ն ի սկզբանե հայտարարել է, որ իրենք կողմ են կառավարման խորհրդարանական համակարգին, սակայն կան խնդիրներ տեքստային ձեւակերպումների հետ կապված:
Նշենք, որ Հանրապետության նախագահ Սերժ Սարգսյանը օգոստոսի 26-ին սկսել է քաղաքական խորհդրակցությունները քաղաքական ուժերի հետ՝ կապված Սահմանադրական բարեփոխումների հետ: Նախագահն արդեն հանդիպել է ԲՀԿ, ՀՅԴ եւ ՕԵԿ ներկայացուցիչների հետ:
Ավելի վաղ հայտնել էինք, որ Սահմանադրության նոր նախագիծն արդեն ուղարկվել է Ազգային ժողով: Սպասվում է, որ աշնանային նստաշրջանի առաջին քառօրյայում կսկսվեն քննարկումները: ԱԺ նախագահի խոսքով՝ աշնան վերջին արդեն նախատեսվում է հանրաքվեն: