ՌԴ Սանկտ Պետերբուրգ քաղաքում ճարտարապետ Ալեքսանդր Լիշնեւսկու առանձնատան ճակատամասից Մեֆիստոֆելի քանդակը կոտրելու պատասխանատվությունը իրենց վրա են վերցրել կազակները։ Այս մասին «Ֆոնտանկա» կայքի խմբագրություն ուղարկած նամակում հայտնել է «Սանկտ Պետերբուրգի կազակներ» կազմակերպության նախկին ղեկավար Դենիս Գորչինը։ Նա ընդգծել է, որ Ռուսական եկեղեցու ներկայացուցիչները կատարվածի հետ կապ չունեն։
«Պետրոգրադկայի տան սատանային մենք ենք կոտրել։ Այն տեսարժան վայր էր դարձել, այդ արձանը հատուկ ցուցադրում էին ուղեցույցերում որպես պարադոքս, թե եկեղեցու դիմաց սատանայի արձան կա, որը թույլ չի տալիս խաչ կառուցել։ Մեզ զայրացնում էր, որ այս լեգենդը զբոսաշրջիկների խայծ էր դարձել։ Ստացվում է, որ դա սատանայի բացահայտ երկրպագություն է»,- ասված է ուղերձում։
Հիշեցնենք, որ ավելի վաղ հայտնի է դարձել, որ բանվորը մուրճի հարվածով կոտրել է Մեֆիստոֆելի դարավոր քանդակը, որը զարդարում էր այդ շենքի վերնաճակատը՝ շենքի կառուցման պահից ՝ 1910 թ.-ից։
