Եթե կառավարությունը չսուբսիդավորի փոքր ու միջին ձեռնարկությունների էլեկտրաէներգիայի ավելացված վարձը, կսկսվի գնաճ։ Այս մասին NEWS.am-ի թղթակցի հետ զրույցում ասացին ՓՄՁ ներկայացուցիչները, որոնց մի մասն արդեն ստացել է պայմանագրեր, որոնցում սահմանված էլեկտրաէներգիայի մեկ կվտ/ժամի համար ՓՄՁ ներկայացուցիչը պետք է վճարի 48,78 դրամ՝ նախկին 41,85 դրամի փոխարեն:
«Մենք ամեն ինչ մեզ մոտ ենք թխում և հացը, և կարկանդակները, ու եթե էլեկտրականությունը թանկանա, մենք էլ ուզած չուզած պիտի գները բարձրացնենք»,- NEWS.am-ի հետ զրույցում ասաց հացաբուլկեղենի արտադրությամբ ու վաճառքով զբաղվող կետերից մեկի տնօրենը։
Մի մասն էլ վստահեցրեց, որ կրճատված առեւտրաշրջանառության պայմաններում առանց այն էլ նվազած եկամուտը էլ ավելի կկրճատվի, ինչի հետեւանքով իրենց բիզնեսը անշահութաբեր կդառնա, հնարավոր է` մտածեն բիզնեսը փակելու մասին։
«Այնպես են անում, որ փակես։ Եթե հիմա գրեթե հաճախորդ չկա, թանկացումից հետո էլ ընդհանրապես մարդ չի մտնի, ես էլ կփակեմ, կթողնեմ ու կգնանք ուրիշ երկիր»,– դժգոհեց գարեջրատներից մեկի սեփականատերը։
Այնուամենայնիվ, գրեթե բոլոր ՓՄՁ–ներում մեզ ասացին, որ «ճար չունեն» եւ ստորագրելու են պայմանագրերը ՀԷՑ–ի հետ։
Ավելի վաղ հայտնել էինք, որ կառավարության վերջին նիստին վարչապետ Հովիկ Աբրահամյանը հայտնել էր, որ խոշոր բիզնեսի մասով կառավարությունը էլեկտրաէներգիայի սակագնի բարձրացման սուբսիդավորում չի կատարելու, իսկ ՓՄՁ-ների վերաբերյալ որոշումը դեռ քննարկման փուլում է:
Նշենք, որ ՀԷՑ մամուլի խոսնակ Նատալյա Սարջանյանը NEWS.am-ի թղթակցի հետ զրույցում նշել էր, որ իրենք առաջնորդվում են Հանրային ծառայությունները կարգավորող հանձնաժողովի որոշմամբ և որ իրենք կառավարության որոշումների հետ որեւէ կապ չունեն, այսինքն սուբսիդավորման հարցը կառավարությունը պետք է քննարկի եւ որոշում ընդունի, իսկ մինչեւ այդ իրենք ՓՄՁ–ներից պահանջելու են վճարել նոր սակագնով։
