ՆԱՏՕ-ի գլխավոր քարտուղար Յենս Սթոլթենբերգը Թբիլիսի կատարած այցի ժամանակ Վրաստանին կոչ է արել շարունակել Ռուսաստանի հետ երկխոսությունը։ Նրա խոսքով՝ Վրաստան-ՆԱՏՕ համատեղ ուսումնական կենտրոնի բացումն ուղղված չէ որեւէ երկրի դեմ։
Հիշեցնենք, որ Վրաստանի եւ ՆԱՏՕ-ի համատեղ ուսումնական կենտրոնը բացվել էր օգոստոսի 27-ին Թբիլիսիի «Կրծանիսի» կենտրոնում։ Բացման արարողությանը ներկա է եղել Հյուսիսատլանտյան դաշինքի գլխավոր քարտուղար Յենս Սթոլթենբերգը։
«Ես եւ ՆԱՏՕ-ն շարունակում ենք Վրաստանին կոչ անել շարունակել երկխոսությունը ՌԴ-ի հետ։ Պաշտպանությունը, փուլային քաղաքականությունը, կայուն դիրքորոշումը եւ երկխոսությունը չեն հակասում իրար։ Ռուսաստանը ապագայում էլ այս կամ այն ճանապարհով կլինի Վրաստանի մեծ հարեւանը, բայց երկխոսությունը միշտ էլ անհրաժեշտ կլինի»,- ասել է գլխավոր քարտուղարը, փոխանցում է «Սպուտնիկ Գրուզիա»-ն։
Սթոլթենբերգը նաեւ նշել է, որ տարածաշրջանում վերջին ժամանակներս Ռուսաստանի ապակառուցողական եւ սադրիչ քայլերը չեն նպաստում անվտանգության բարելավմանը։
