Կաշառք վերցնելու համար 3.5 տարվա ազատազրկման դատապարտված՝ Նոր Նորքի զինկոմ Ռաֆայել Զախարյանի գործը նորից քննվելու է առաջին ատյանի դատարանում: Նման որոշում է կայացրել Վերաքննիչ քրեական դատարանը:
Վերաքննիչը բեկանել է առաջին ատյանի կայացրած որոշումը եւ գործը նորից ուղարկել դատարան՝ բեկանված մասով նոր քննության:
Հիշեցնենք, որ վերաքննիչ բողոք էր ներկայացրել դատախազը, որը պահանջում էր փոխել պատժաչափը՝ նշանակելով 9 տարվա ազատազրկում:
Հիշեցնենք, որ ըստ մեղադրական եզրակացության՝ Ռաֆայել Զախարյանը 2014թ. մարտի 17-ին իր աշխատասենյակում, Երեւան քաղաքի Ավան 7 փող. 45 տան բնակիչ Գագիկ Վարդանյանից, որդու՝ Ալբերտ Վարդանյանի օգտին առողջական վիճակի բերումով պահեստազորում հաշվառելու, դրանով իսկ զինվորական ծառայության զորակոչից վերջնականապես ազատելու դիմաց պահանջել է առանձնապես խոշոր չափերով՝ 1.659.840 ՀՀ դրամին համարժեք 4000 ԱՄՆ դոլար կաշառք: Երկու օր անց Զախարյանը նույն զինկոմիսարիատի զորակոչային բաժանմունքի պետի աշխատասենյակում Գ.Վարդանյանից ստացել է 3900 ԱՄՆ դոլար:
Ռաֆայել Զախարյանին մեղադրանք է առաջադրվել Քրեական օրենսգրքի 311-րդ հոդվածի 4-րդ մասի 2-րդ կետով եւ 235-րդ հոդվածի 1-ին մասով: