Բաղրամյան պողոտայում հունիսի 15-ի լույս 16-ի գիշերը պայթյունի հետեւանքով մահացած 21-ամյա Գոռ Թումոյանի գործով նախաքննությունը շարունակվում է: Այս մասին NEWS.am-ի թղթակցին հայտնել են Քննչական կոմիտեի մամուլի ծառայությունից:
Նրանց փոխանցմամբ՝ գործի քննությունն ընթանում է ՀՀ քննչական կոմիտեի Երևանի քննչական վարչության Արաբկիր վարչական շրջանի քննչական բաժնում: Դեպքի էական հանգամանքները պարզելու նպատակով նշանակվել են մի շարք փորձաքննություններ, որոնց պատասխանները դեռևս չեն ստացվել:
Հիշեցնենք, որ Գոռ Թումոյանի մայրը՝ Նարինե Գրիգորյանը մեզ հետ զրույցում հայտնել էր, որ որդուն սպանել են ամուսնու եղբայրն ու ողբորորդին: «Համոզված եմ, որ իրենք տունս քանդեցին, որդուս սպանեցին: Դրանից հետո էլ իրավապահ մարմիններին փող տվեցին ու գործը փակել տվին»,- ասել էր տիկին Նարինեն:
Ավելի վաղ ՏԿԱԻՆ մամուլի ծառայությունը հայտնել էր, որ 2015թ. հունիսի 15-ի լույս 16-ի գիշերը պայթյուն է տեղի ունեցել Երեւանի Բաղրամյան պողոտայի թիվ 60 շենքի հետնամասի ավտոտնակում: Պարզվել է, որ ավտոտնակի դարպասները շպրտվել են հարակից սեփական տան ուղղությամբ եւ թիվ 60 շենքի բակային հատված, որտեղ հայտնաբերվել է 21-ամյա Գոռ Թումոյանը: Վերջինս «Հերացու անվան թիվ 1 համալսարանական հիվանդանոց» հոսպիտալացման ճանապարհին մահացել է:
