ՌԴ Պետդումայի նախկին պատգամավոր Միխայիլ Գլուշենկոն 17 տարվա ազատազրկման է դատապարտվել քաղաքական գործիչ Գալինա Ստարովոյտովայի սպանության համար։ Նա պատիժը կկրի հատուկ ռեժիմով գաղութում։ Գլուշենկոն նաեւ պարտավորվել է 300 հազար ռուբլի տուգանք մուծել։
Մեղադրյալը իր վերջին խոսքում հայտարարել է, որ սպանության համար ինքը անձնական դրդապատճառներ չի ունեցել։ «Ես ներողություն եմ խնդրում ռուս ազգից։ Առանց ինձ այս հանցագործությունը չէր բացահայտվի։ Գործը կասեցվել էր»,- ասել է Գլուշենկոն եւ խոստովանել, որ եթե չկատարեր Բարսուկովի հրահանգները, իրեն կսպանեին, հայտնում է «ՌԻԱ Նովոստի»-ն։
Ավելի վաղ հաղորդվում էր, որ Գլուշենկոն Սանկտ Պետերբուրգի դատախազության հետ նախադատական համաձայնագիր է կնքել, որով իրեն մեղավոր է ճանաչել եւ ցուցմունք տվել գործարար Վլադիմիր Բարսուկովի դեմ, ով 15 տարվա ազատազրկման է դատապարտվել Պետերբուրգի խանութների վրա հարձակումներ իրականացնելու եւ սեփականատերերից գումար կորզելու համար։
«Ժողովրդավարական Ռուսաստան» կուսակցության համանախագահ, ՌԴ Պետդումայի պատգամավոր Գալինա Ստարովոյտովան սպանվել էր 1998թ. նոյեմբերի 21-ին Սանկտ Պետերբուգում։
