«Հյուսիս–հարավ ճանապարհային միջանցք» ներդրումային ծրագրով կառուցվող արագընթաց մայրուղու որակից գոհ ենք: Այս մասին, այսօր՝ օգոստոսի 28-ին, մայրուղու Երեւան-Արտաշատ հատված այցելության ժամանակ նշել է ՀՀ տրանսպորտի եւ կապի նախարար Գագիկ Բեգլարյանը:
Տրանսպորտի եւ կապի նախարարությունից հայտնում են, որ այդ հատվածում ավարտվել են բետոնապատման աշխատանքները, եւ այժմ կառուցապատող ընկերությունն իրականացնում է ճանապարհի լուսավորության, կահավորման աշխատանքներ:
«Մենք այսօր որակից գոհ ենք, աշխատանքներն իրենց հունով շարունակվում են։ Մեր ժողովուրդը շատ անհանգստանում է, թե աշխատանքներ չեն կատարվում, բայց տեսնում եք, որ աշխատանքների մեծ մասն արդեն ավարտված է: Կահավորանքը, որն իրականում աշխատատար է, կավարտենք դեկտեմբերի վերջին։ Կարեւորն այն է, որ այն աշխատանքներն են մնացել, ինչը եղանակը մեզ թույլ կտա, որ ավարտենք դեկտեմբերին»,- նշեց Գագիկ Բեգլարյանը:
Նախարարը «Հյուսիս-հարավ ճանապարհային միջանցք» ներդրումային ծրագրի 1-ին եւ 2-րդ տրանշները կառուցապատող իսպանական «Կորսան Կորվիամ» ընկերության պատասխանատուների հետ զրույցում անդրադարձավ հաճախ հնչող այն մտահոգությանը, թե այդ ճանապարհահատվածով երթեւեկելիս՝ ճանապարհի կարերի պատճառով ձայն է լսվում։
«Կորսան Կորվիամ» ընկերության արտադրության պետ Լուիս Մարտինեսը լրագրողներին ասաց. «Բետոնի պատվածքն, ինչպես տեսնում եք, կտրած է եւ կարերի մեջ հատուկ նյութ է լցված։ Նպատակն այն է, որ ամառ-ձմեռ ջերմաստիճանի տատանման ժամանակ բետոնը չճաքի։ Իսկ ձայնը այդ կարերին մեքենաների անիվների հպումից է գալիս: Նման բանի կարող եք ականատես լինել օրինակ Գերմանիայում կամ եվրոպական որեւէ այլ երկրում, որտեղ բետոնե ծածկույթով ճանապարհ կա»:
Ընկերության պատասխանատուի խոսքով՝ ճանապարհահատվածը լիարժեք շահագործման հանձնելուց հետո, երբ երթեւեկության թույլատրելի արագությունը կլինի ժամում 110 կմ, ձայնն այլեւս ոչ ոքի չի անհանգստացնի: