Սանկտ-Պետերբուրգի օրենսդիր ժողովի պատգամավոր, «Եդինայի Ռոսիա» խմբակցության անդամ Վիտալի Միլոնովն առաջարկել է Ռուսաստանում համառուսաստանյան մանկապատանեկան հայրենասիրական կազմակերպություն ստեղծել: Խորհրդային պիոներիայից այդ կազմակերպությունը կտարբերվի նրանով, որ բոլոր երեխաների համար պարտադիր կլինի դեռեւս մանկապարտեզի տարիքից:
Պատգամավորն առաջարկում է կազմակերպությունը կոչել «Բարեգործների» կամ «Սուրբ Գեորգիի», իսկ դրա խորհրդանիշները Միլոնովի կարծիքով կարող են լինել սեւ-նարնջագույն գեորգիեւյան գույները եւ Հաղթական Գեորգիի դեմքը:
«Ներկայիս ժամանակները շատ բանով հիշեցնում են պատերազմական ժամանակաշրջանը: Որպես կանոն, հենց երիտասարդությունն է գտնվում գաղափարական զենքի խաչման կետում եւ դառնում է արեւմտյան քայքայիչ քարոզչության զոհը: Այն բաները, որոնք 5–10 տարի առաջ հասարակությունում անընդունելի էին թվում, օրենքի ուժ են ստանում», - հայտարարել է Միլոնովը «Իզվեստիա» թերթին տված հարցազրույցում:
Նրա խոսքով, պետությունը պիտի ֆինանասավորի այդ շարժումը:
Աճող սերնդի դաստիարակության վերաբերյալ իր ծրագրերը Վիտալի Միլոնովն ուղարկել է Դմիտրի Մեդվեդեւին:
