Հայաստանն ու Ռուսաստանը գտնվում են մշտական կապի մեջ, եւ մշտապես երկու երկրների ուշադրության կենտրոնում են գտնվում երկկողմ համագործակցության արդիական հարցերը, տարածաշրջանային եւ միջազգային խնդիրները: Այդ մասին հայտարարել է Հայաստանի նախագահ Սերժ Սարգսյանը` Ռուսաստանի նախագահ Դմիտրի Մեդվեդեւի հետ Երեւանում կայացած համատեղ մամուլի ասուլիսում:
Նա նկատել է, որ ընդհանուր առմամբ, երկու երկրների ղեկավարները հանդիպել են ավելի քան 30 անգամ: «Այս այցը, սակայն, առանձնահատուկ է, սա ոչ միայն մեր ընտանիքի, այլեւ ողջ հայ ժողովրդի մեծ բարեկամների պետական այց է»,- ասել է Սերժ Սարգսյանը: Նա ընդգծել է, թե հանդիպման ընթացքում հաստատվել է երկկողմ ռազմավարական համագործակցությունը շարունակելու երկու երկրների ձգտումը, ինչը բխում է ոչ միայն Հայաստանի եւ Ռուսաստանի, այլեւ ողջ տարածաշրջանի շահերից:
Սերժ Սարգսյանը նկատել է նաեւ, որ Ռուսաստանը Հայաստանի տնտեսության հիմնական ներդրողն է: Հայկական տնտեսության մեջ ռուսական ներդրումների բաժինը կազմում է 60 տոկոս կամ ավելի քան 500 մլն դոլար, իսկ 2010թ. առաջին կիսամյակում ապրանքաշրջանառությունն աճել է 20 տոկոսով: Սերժ Սարգսյանը հաղորդել է, որ համագործակցությունը շարունակվելու է տրանսպորտային ենթակառուցվածքների ոլորտում:
«Ռուսաստանի ղեկավարի հետ պայմանավորվել ենք շարունակել համագործակցությունը ՀԱՊԿ-ի, ԵՎՐԱԶԵՍ-ի, ԵԱՀԿ-ի եւ այլ կառույցների շրջանակներում»,- հայտարարել է Սերժ Սարգսյանը: