Հանրապետական կուսակցության ամբողջ կազմը չէ, որ ուրախ է սահմանադրական բարեփոխումների նախագծով առաջարկող խորհրդարանական կառավարմանը, փոփոխությունն անհրաժեշտ է Սերժ Սարգսյանին։ Այս մասին այսօր՝օգոստոսի 28-ին լրագրողների հետ զրույցում ասաց կուսակցության անդամ Արմեն Աղայանը։
«Սա ավելի շատ պետք է Սերժ Սարգսյանին, բայց ժառանգորդները, ովքեր հավակնում էին նախագահ դառնալ, հիմա պիտի տխուր վիճակում հայտնվեն, որովհետեւ երբ իրենց հերթը եկավ նախագահի պաշտոնը զբաղեցնելու, Սերժը որոշել ա իրա հետ տանի պաշտոնը»,-ասաց Աղայանը։
Արմեն Աղայանը խոսքով՝ եթե անգամ սահմանադրական փոփոխությունների ներկայացված նախագիծը ընդունվի, ապա երկար կյանք չի ունենա․ «Սահմանադրությունը կունենա հինգ տարվա, առավելագույնը` տասը տարվա կյանք։ Հաջորդ իշխանությունը, որ հերթական ցնցումներից հետո կձեւավորվի, արդեն իր հագով մի հատ նոր կոստյում է կարելու, հագցնի հայկական պետությանը»։
Արմեն Աղայանը կարծում է, որ հիմա Հանրապետական կուսակցությունում ցնցումներ կան՝ պայմանավորված Սերժ Սարգսյանին փոխարինողի ընտրությամբ։
«Ցնցումներ կան Սերժ Սարգսյանի ժամկետն ավարտվելու եւ ժառանգորդի փաստացի չգոյության պայմանններում։ Հիշեք` քոչարյանական ժամանակներում բոլորս գիտեինք, որ իշխանության է գալու Սերժ Սարգսյանը, իսկ այսօր ոչ մեկ չի կարող անուն տալ, թե ով է փոխարնելու։ Հետեւաբար, սա արդեն ցնցումներ է ստեղծում Հանրապետական կուսակցությունում, ստեղծում որոշակի մրցակցային իրավիճակներ»,- նշեց Աղայանը։
Արմեն Աղյանը կոչ արեց համագործակցել սահմանադրական բարեփոխումների ներկայացրած նախագծի դեմ պայքարում։
Հիշեցնենք, որ Սահմանադրական բարեփոխումների վերաբերյալ Հայաստանի նախագահին կից հատուկ հանձնաժողովը օգոստոսի 20-ին որոշում է կայացրել հաստատել սահմանադրական բարեփոխումների եւ հիմնավորումների նախագիծը եւ ներկայացնել Հայաստանի նախագահ Սերժ Սարգսյանին: Օգոստոսի 21-ին Սերժ Սարգսյանը Հայաստանի Ազգային ժողով է ուղարկել սահմանադրական բարեփոխումների նախագիծը: Այս շաբաթվանից նախագահը Հայաստանի քաղաքական ուժերի ներկայացուցիչների հետ խորհրդակցություններ է անցկացրել սահմանադրական փոփոխությունների նախագծում արձանագրված մոտեցումների վերաբերյալ: Նախագահը փորձագիտական հանձնախմբին նաեւ հանձնարարել է շարունակել Վենետիկի հանձնաժողովի հետ երկխոսությունը այն կետերի շուրջ, որոնց առիթով հանձնաժողովը նախնական կարծիք էր հայտնել և որոնց վերաբերյալ առայժմ համաձայնեցված լուծում չի գտնվել: