Հնդկաստանի Ուտտար- Պրադեշ նահանգի գյուղացիները որոշել են դաժանաբար պատժել երկու աղջիկներին ՝ նրանց եղբոր «անբարոյական վարքագծի» համար։ Գյուղի մեծերի ժողովի ժամանակ քույրերին դատապարտել են բռնաբարության, հայտնում է Amnesty International միջազգային իրավապաշտպան կազմակերպությունը։
Մահացու վտանգը սպառնում է 23-ամյա Մինաշկի Կումարիին ու նրա 15 ամյա քրոջը։ Աղջիկները ու նրա ընտանիքը, որը դալիտների (անձեռնմխելիների) կաստայից է, ստիպված են եղել փախչել հայրենի գյուղից։ Վախենալով իրենց կյանքի համար հիմա նրանք թաքնվում են Դելիում։
Այդ աղջիկները վտարանդի են դարձել այն բանից հետո, երբ նրանց եղբայրը ՝ Ռավին, սիրահարվել է մի աղջկա ջատերի հողագործական կաստայից, որն ավելի բարձր է համարվում։ Մարտ ամսին երիտասարդը փախել է իր սիրեցյալի հետ, ում դրանից մեկ ամիս առաջ բռնի ամուսնացրել էին մեկ այլ մարդու հետ։ Իսկ Ռավիի արարքից վրդովված համագյուղացիները որոշել են ինքնադատաստան տեսնել նրա քույրերի հետ։
Մայիսի 24-ին Կումարի ընտանիքը, զգալով վտանգը, փախել է գյուղից։ Բարկացած գյուղացիները վեց օր հետո քանդել են նրանց լքված տունը։ Իսկ հուլիսի 30-ին գյուղի տղամարդկանց խորհուրդը որոշել է, որ Մինակշին ու նրա քրոջը պետք է վերադարձնել, իսկ հետո բռնաբարել, մրոտել նրանց դեմքը ու նրանց մերկացած վիճակում դնել ընդհանուր տեսության, հայտնում է NEWSru.com-ը ՝ վկայակոչելով The Daily Mirror-ը։
Օգոստոսի 5-ին Մինակշին դիմել է Հնդկաստանի Գերագույն դատարանին ՝ խնդրելով իրեն պետական պաշտպանություն տրամադրել։ Արդարադատության աշխատակիցները աղջկա դիմումը ուղարկել են Ուտտար – Պրադեշ նահանգի ադմինիստրացիա։ Այնտեղ դիմումը պետք է քննեն մինչեւ սեպտեմբերի 15-ը։