Ուկրաինայի սահմանադրության մեջ ապակենտրոնացմանն ուղղված փոփոխությունների նախագիծը չի հանգեցնի ոչ դաշնայնացման, ոչ էլ որեւէ տարածաշրջանի հատուկ կարգավիճակ տալու: Այս մասին հայտարարել է Ուկրաինայի նախագահ Պյոտր Պորոշենկոն՝ ելույթ ունենալով Կիեւում «Պյոտր Պորոշենկոյի բլոկ-Համերաշխություն» եւ «ՈւԴԱՌ» կուսակցությունների համատեղ համագումարի ժամանակ:
«Ոչ մի դաշնայնացում, ոչ մի կարգավիճակ: Եվ հենց հանուն դրա մենք պետք է քվեարկենք երկուշաբթի (օգոստոսի 31-ին) խորհրդարանում եւ հենց այդպես մենք կբացահայտենք այդ սուտը եւ կպաշտպանենք Ուկրաինայի միատարր կարգավիճակը»,-ասել է նախագահը, հաղորդում է «Ինտերֆաքս-Ուկրաինան»:
Պորոշենկոյի խոսքով, առաջարկվող սահմանադրական փոփոխությունը չեղյալ է համարում Ուկրաինայի սահմանադրության 92-րդ հոդվածը, որը սահմանում է Կիեւի կարգավիճակը որպես մայրաքաղաք, ինչպես նաեւ երկրի առանձին քաղաքների կարգավիճակը:
«Սրանից փորձում են օգտվել: Երեկ Զապորոժյան խորհուրդը որոշում է կայացրել, որ իրենց նույնպես կարգավիճակ է պետք, եւ իրենք գործելու են Սահմանադրության 92-րդ հոդվածի հիման վրա»,-ասել է նա:
