Եվրոպական տիեզերական գործակալության մասնագետները թեյի սունկ են ուղարկել տիեզերք։ Սունկն արդեն մեծ ժողովրդականություն է վայելում առողջ կենսակերպի կողմնակիցների մոտ։ Expose նախագծի շրջանակներում մասնագետները կուսումնասիրեն տիեզերական միջավայրում բազմաբջիջ օրգանիզմների կենդանի մնալու հնարավորությունը։

Գիտնականները թեյի սնկի մարմինը ձեւավորող մանրէներն ու սնկերը տեղադրել են Միջազգային տիեզերական կայանի արտաքին մակերեսին։ Այնտեղ դրանք կմնան 18 ամիս, գրում է Space.com-ը։

Ավելի վաղ Երկիր մոլորակի վրա անցկացված փորձարկումները ցույց էին տվել, որ թեյի սունկն ի վիճակի է անբարենպաստ պայմաններում պաշտպանել իրեն՝ ցելյուլոզի հիման վրա կառուցվածքներ ձեւավորելով։ Այսպիսով՝ միկրոօրգանիզմները կարող են դիմակայել բարձր ջերմաստիճանին եւ ռադիացիային։

Գիտնականները հույս ունեն, որ այս փորձը կօգնի Երկիր մոլորակի սահմաններից դուրս կյանք հայտնաբերել։

Expose-R2 կոնտեյները Միջազգային տիեզերական կայան էր ուղարկվել դեռ անցյալ տարի, սակայն ծրագիրը կավարտվի միայն 2016թ., երբ կոնտեյները կվերադառնա Երկիր, եւ հնարավոր կլինի ստանալ արդյունքները։