Արարատի մարզի Սուրենավան գյուղում գյուրզա տեսակի օձի խայթոցից մահացած 54-ամյա Կարինե Թադեւոսյանին «Արարատ» բժշկական կենտրոն տեղափոխելուց անմիջապես հետո ներարկվել է «Անտիգյուրզին» հակաթույն: Այս մասին NEWS.am-ի հետ զրույցում ասաց հիվանդանոցի տնօրեն Արայիկ Սարդարյանը՝ հերքելով մահացած կնոջ որդու պնդումներն այն մասին, որ մորը հակաթույն չեն ներարկել:
«Հակաթույնը ներարկվել է հենց ընդունարանում՝ առաջին հարկում, բերելուց 2-3 րոպե հետո եւ 3 ժամ դրանից հետո բժիշկը նստել է կողքին: Ուղղակի մենք այնքան հիմար գտնվեցինք, որ թույլատրեցինք, որ այդ կնոջ քույրը Վերակենդանացման հիվանդասենյակում նստի, էդպես պիտի չանեինք, ու հաջորդին չենք անելու, ուզում է` գյուղացին նեղանա, ինչ ուզում է անի»,-ասաց հիվանդանոցի տնօրենը՝ վստահեցնելով, որ հակաթույնը ժամկետանց չի եղել:
Արայիկ Սարդարյանի խոսքով՝ հակաթույն սրսկելու ժամանակ փաստաթուղթ չի ստորագրվել, քանի որ կինը ի վիճակի չի եղել, իրենք էլ չեն ստիպել, միայն բուժքույրն է ստորագրել հիվանդանոցի մոտ պահվող փաստաթղթերը` հակաթույն ներարկելու մասին:
«Արարատի» ԲԿ-ի տնօրենը նշեց, որ իրենք կնոջը «Էրեբունի» ԲԿ են տեղափոխել այն ժամանակ, երբ թույնը լցվել է աղիները, եւ իրենք չեն կարողացել ախտորոշել, թե կոնկրետ որ հատվածում է լցվում:
«Մենք կնոջը «Էրեբունի» ենք տեղափոխել հակագյուրզին, հակաշոկային եւ զանազան այլ ներարկումներ անելուց հետո, երբ տեսանք, որ արյունը հեմոլիզվում է գյուրզայի թույնից եւ լցվում է հյուսվածքների մեջ՝ այդ թվում նաեւ աղիների մեջ, եւ քանի որ մենք չէինք կարող գտնել, թե աղիների որ հատվածից է լցվում, տեղափոխեցինք Երեւան: Մենք ոչ մի ժամանակ բաց չենք թողել, մենք ամեն ինչ ճիշտ ու մարդավայել արել ենք»,-ասաց Արայիկ Սարդարյանը:
Նրա խոսքով՝ Առողջապահության նախարարությունը այժմ վարչական վարույթ է հարուցել, եւ դեպքի հետ կապված ստուգումներ է անցկացնում հիվանդանոցում:
Նշենք, որ օձի խայթոցից մահացած 54-ամյա Կարինե Թադեւոսյանի հարազատները պնդում են, որ կնոջ մահվան պատճառը Արարատի ԲԿ-ի աշխատակիցների անփույթ վերաբերմունքն է եղել եւ պահանջում են պատժել մեղավորներին:
Օգոստոսի 20-ին Առողջապահության նախարարության տարածած հաղորդագրության մեջ ասվում է, որ Կարինե Թադեւոսյանը հիվանդանոց է տեղափոխվել դեպքից միայն 12 ժամ անց, սակայն օգոստոսի 27-ին նախարարությունը հերքել էր իր առաջին հաղորդագրությունը՝ նշելով, որ կինը հիվանդանոց է տեղափոխվել անմիջապես օձի խայթելուց հետո:
Ավելի վաղ NEWS.am-ը հայտնել էր, որ Արարատի մարզի Սուրենավան գյուղում օգոստոսի 17-ին տնամերձ հողամասում աշխատելիս Սուրենավանի բնակչուհի, 54-ամյա Կարինե Թադեւոսյանին օձ է խայթել։ Նրան տեղափոխել են Արարատի հիվանդանոց, այնուհետեւ Երեւան, որտեղ էլ կինը 2 օր անց մահացել է:
