Microsoft ընկերությունը շահել է դատական վեճը InterDigital ընկերության հետ, որը ծրագրային ապահովում արտադրողին մեղադրում էր պատենտային իրավունքների խախտման համար:
ԱՄՆ միջազգային առեւտրի հարցերով հանձնաժողովը մերժել է դատարանի ՝ ավելի վաղ կայացրած որոշումը՝ իր բջջային հեռախոսների արտադրության մեջ InterDigital-ի կողմից պատենտավորված տեխնոլոգիաներ օգտագործելու համար Microsoft -ին պատժելու մասին:
Դելավեր նահանգում տեղակայված InterDigital -ը դեռ 2007թ. ԱՄՆ միջազգային առեւտրի հարցերով հանձնաժողովին հայց էր ներկայացրել, որում մեղադրում էր ֆիննական Nokia ընկերությանը՝ երկու պատենտների խախտման համար: Անցած տարի Microsoft -ը ձեռք էր բերել Nokia -ի՝ բջջային ապրանքների ստեղծման ստորաբաժանումը, դրա համար էլ բոլոր բողոքներն ինքնաբերաբար փոխանցվել են ամերիկյան կորպորացիային, հայտնում է «ՏԱՍՍ»-ը:
2015թ. ապրիլին դատավոր Թեոդոր Էսսեքսը հիմնավորված է ճանաչել առաջադրված մեղադրանքները եւ արգելել Microsoft -ի արտադրանքի ներմուծումն ԱՄՆ: Տվյալ որոշումը պետք է հետագայում հաստատեին հանձնաժողովի մյուս անդամները, որոնք սակայն չեն հաստատել այն:
Եթե ներմուծման արգելքի մասին որոշումը ուժի մեջ մտներ, ապա Microsoft-ի սարքավորումները, որոնց մեծամասնությունը արտադրվում է ԱՄՆ սահմաններից դուրս գտնվող գործարաններում, մասնավորապես Չինաստանում,, պարզապես չէին կարողանա անցնել ամերիկյան մաքսատունը: