Ուկրաինայի նախագահ Պյոտր Պորոշենկոն նորից հայտարարել է, որ Սահմանադրական փոփոխությունների նախագծով տարածքների համար որեւէ հատուկ կարգավիճակ չի սահմանվի, ավելին՝ Ուկրաինայի նոր Սահմանադրությամբ չեն լինելու մայրաքաղաքի եւ այլ քաղաքների համար հատուկ կարգավիճակներ ամրագրող նորմեր, հայտնում է «Ինտերֆաքս-Ուկրաինան»։
Նա նշել է, որ Զապորոժիեի շրջանային խորհուրդը ընդունել է նախագահին եւ Գերագույն Ռադային ուղղված՝ իրեն հատուկ կարգավիճակ շնորհելու մասին դիմումը։ «Դրան կհաջորդի ինքնիշխանությունների շքերթը։ Կարգավիճակի մասին իրավունք չի լինելու»,- ընդգծել է Պորոշենկոն։
Պորոշենկոյի խոսքով՝ Սահմանադրության մեջ փոփոխությունները չեն ենթադրում հատուկ կարգավիճակ, այլ միայն տեղական ինքնակառավարման իրականացման առանձնահատուկ կարգի հնարավորություն է տալիս Դոնեցկի եւ Լուգանսկի մարզերի առանձին տարածքային միավորներում։
Սահմանադրական փոփոխությունների նախագահական փաթեթի քվեարկությունը կկայանա 2015թ. օգոստոսի 31-ին։
