ԳԴՀ կանցլեր Անգելա Մերկելն ու Ֆրանսիայի նախագահ Ֆրանսուա Օլլանդը Ռուսաստանի նախագահ Վլադիմիր Պուտինի հետ հեռախոսային բանակցությունների ընթացքում հաստատել են իրենց հավատարմությունը մինսկյան համաձայնագրերի կատարմանը: Այս մասին օգոստոսի 29-ին հայտնում է Գերմանիայի կառավարությունը:
«Կողմերը միակարծություն են դրսեւորել այն հարցում, որ մինսկյան պայմանավորվածությունները Դոնբասում իրավիճակի կարգավորման հիմքն են»,- ասված է ԳԴՀ կառավարության հայտարարության մեջ, որը մեջբերում է «Ինտերֆաքսը»:
Ընդ որում Գերմանիայի, Ֆրանսիայի եւ Ռուսաստանի առաջնորդները համաձայնության են եկել՝ ապագայում «նորմանդական քառյակի» հանդիպում կազմակերպելու անհրաժեշտության հարցում:
«Բանակցող գործընկերները ընդգծել են, որ պատրաստ են աշխատել մինսկյան պայմանավորվածությունների կատարման ուղղությամբ՝ «նորմանդական քառյակի» շրջանակում եւ Ուկրաինայի նախագահի հետ համատեղ»,- ասված է հայտարարության մեջ:
